თბილისი პრაიდი: სჯობს ოკუპანტსა ნაძრახსა, პრაიდი სახელოვანი!
თბილისი პრაიდი განცხადებას ავრცელებს, რომელიც რუსეთის დუმის დეპუტატის საქართველოში ვიზიტს და პარლამენტის თავმჯდომარის პოზიციიდან მიმართვას შეეხება.
"მაშინ როდესაც ქართული სახელმწიფო მის მოქალაქეებს უცხადებს, რომ ის მათ ვერ მისცემს კონსტიტუციით გარანტირებულ უფლებებს და ვერ დაიცავს ფიზიკური განადგურებისგან, მზადაა უზრუნველყოს რუსეთის დუმის იმ დეპუტატების სტუმრობა, რომლებიც ღიად უჭერენ მხარს საქართველოს და უკრაინის ოკუპაციას.
ქვეყანაში, სადაც ცხოვრობს 300 000 დევნილი, საქართველოს პარლამენტი თავს უფლებას აძლევს უმასპინძლოს რუს დეპუტატებს, მეორეს მხრივ კი საკუთარ მოქალაქეებს გვეუბნება, რომ ჩვენ ვართ სამოქალაქო დაპირისპირების საფრთხე.
❗რუსეთი არის ოკუპანტი სახელმწიფო, რომელიც პატივს არ სცემს არათუ ჩვენი დევნილი მოქალაქეების, არამედ საკუთარი მოქალაქეების უფლებებსაც. რუსეთში ლგბტქი საკითხებზე საუბარი კანონით ისჯება, ხოლო მოსკოვის პრაიდის გამართვის აკრძავა ვლადიმერ პუტინის პირად ახირებად რჩება დღემდე. რუსეთის დიდი ქალაქების ქუჩებში ისევე ნადირობენ ლგბტქი ადამიაენებზე, როგორც კავკასიელ და განსაკუთრებით კი ეთნიკურად ქართველ მოქალაქეებზე.
თბილისი პრაიდი სოლიდარობას უცხადებს მოქალაქეებს, რომლებიც ამ უტიფარ ქმედებას აპროტესტებენ და მოუწოდებს სახელმწიფოს დაუყოვნებლივ მიიღოს სწორი პოლიტიკური გადაწყვეტილებები; შეწყვიტოს მტერი სახელმწიფოს მიმართ ღია კარის პოლიტიკის წარმოება და დაასრულოს საკუთარი ლგბტქი მოქალაქეების საზოგადოების მტრად წარმოჩენა.
დღეს, „ღირსების მარშის“ მხარდაჭერა გასცდა ლგბტქი თემის უშუალო საჭიროებების მოთხოვნას და ის ჩვენი საზოგადოებსი ღირსების საკითხად იქცა. დღეს შეგვიძლია ტოლობის ნიშანი დავსვათ რამდენიმე რამეს შორის:
პრორუსული პოლიტიკა = ჰომოფობიას, ძალადობას, ავტორიტარიზმს, კორუფციას...
დემოკრატიისკენ სწრაფვა = ყველა მოქალაქისთვის განურჩევლად სამოქალაქო, პოლიტიკური, სოციალური, კულტურული და მატერიალური განსხვავებებისა თანასწორუფლებიანი საცხოვრებელი გარემოს უზრუნველყოფა." - ნათქვამია განცხადებაში
რუსეთის დუმის დეპუტატების ვიზიტით გამოწვეული პროტესტი უკიდურესად გამწვავდა მას შემდეგ, რაც ასამბლეის დილის სხდომას საქართველოს პარლამენტის თავმჯდომარის ადგილიდან უძღვებოდა რუსი დეპუტატი, კომუნისტი სერგეი გავრილოვი. დუმის წევრს საქართველოს დატოვება ნაჩქარევად მოუწია. სასტუმრო მან დაცვის თანხლებით და აქციის ფონზე დატოვა.
მართლმადიდებლობის საპარლამენტთაშორისო ასამბლეაში საქართველოს პარლამენტის დელეგაციის ძირითად შემადგენლობაში ზაქარია ქუცნაშვილის გარდა არიან "ქართული ოცნების" და "პატრიოტთა ალიანსის" წევრები დიმიტრი ხუნდაძე და ადა მარშანია. სათადარიგო შემადგენლობაში "ქართული ოცნების" წარმომადგენლები ენძელა მაჭავარიანი და ზვიად ძიძიგური და დამოუკიდებელი დეპუტატი გედევან ფოფხაძე.