გურამ ფალავანდიშვილი გაათავისუფლეს
გურამ ფალავანდიშვილის სასამართლო პროცესი 5 ივლისამდე გადაიდო და ის გაათავისუფლეს. ლევან ვასაძის „სახალხო ლეგიონის“ ერთ-ერთი აქტიური წარმომადგენელი 20 ივნისს, დილით დააკავეს, პოლიციისთვის წინააღმდეგობის გაწევისა და სიტყვიერი შეურაცხყოფისთვის.
როგორც ფალავანდიშვილმა უთხრა ჟურნალისტებს, დილით ის პოლიციაში დაიბარეს მიმდინარე გამოძიების ფარგლებში, მაგრამ არ გამოცხადდა და შემდეგ მას გზაში დახვდნენ.
„რახან არ მივედი და ამ დაკითხვების გამო ვერ დამაკავეს, ამიტომ ასე უაზროდ დამაკავეს, რომ არ ვყოფილიყავი აქციაზე... მანქანა გადააყენეო, გადავაყენე; დაბრძანდიო, დავბრძანდი, არავითარი ზედმეტი სიტყვა არ ყოფილა... მერე ჩამიწერეს, რომ ვითომ პოლიციას შევაგინე თუ რაღაც... მაგაზე ხელი არ მოვაწერე“, - თქვა ფალავანდიშვილმა. მისი თქმით, გრძელდება ბრძოლა "თბილისი პრაიდის" წინააღმდეგ.
გათავისუფლების შემდეგ, გურამ ფალავანდიშვილი ვერის პარკში მივიდა და იქ შეკრებილთა ლოცვას შეუერთდა.
20 ივნისს პოლიციის მთავარ სამმართველოში გამოკითხვაზე დაიბარეს ბიზნესმენი ლევან ვასაძეც, მის მიერ გაკეთებული განცხადების კვალდაკვალ დაწყებული გამოძიების ფარგლებში.
შს სამინისტროში გამოძიება მიმდინარეობს უკანონო ფორმირების შექმნის, ხელმძღვანელობის და მასში გაწევრიანების ფაქტებზე, საქართველოს სისხლის სამართლის კოდექსის 223-ე მუხლის პირველი ნაწილით.
16 ივნისს, ბიზნესმენმა ლევან ვასაძემ ვერის პარკში გამართულ აქციაზე გამოაცხადა, რომ იქმნება „სახალხო ლეგიონი“, რომელიც „თბილისი პრაიდის“ გამო ქალაქში პატრულირებას დაიწყებს. ვასაძის თქმით, მოხალისეები ქამრებით შეუკრავენ ხელს უმცირესობათა წარმომადგენლებს და ტერიტორიიდან გაიყვანენ.