DW: ევროპაში საგრძნობლად გაიზარდა მოთხოვნა ხარისხიან ქართულ ღვინოზე

რუსეთის ფედერალური სამსახური „როსპოტრებნადზორი“ ირწმუნება, რომ ქართული ღვინის ხარისხი გაუარესდა, თუმცა, მსგავს ტენდენციას ვერ ხედავენ გერმანელი და ავსტრიელი ღვინით მოვაჭრეები - ამის შესახებ ვრცელ სტატიაში წერს გერმანული მაუწყებლის, „დოჩე ველე“-ს(DW) რუსული სამსახური. მისი ინფორმაციით, გერმანელები და ავსტრიელები ევროკავშირის ბაზრისთვის საქართველოში ყიდულობენ ყველაზე კონკურენტუნარიან პროდუქციას და მასზე მოთხოვნა სწრაფად იზრდება.


„ჩვენ ქართული ღვინის ხარისხის პრობლემა არ გვაქვს და არც ხელისუფლებას, რომელიც იმპორტს მუდმივად აკონტროლებს“ - განაცხადა ჰამბურგში მდებარე ინტერნეტ-მაღაზიის, GeoVino-ს თანამფლობელმა, ანდრე ჰაინმა.


DW-ს ესაუბრნენ გერმანიასა და ავსტრიაში ქართული ღვინის იმპორტიორი სხვა კომპანიების წარმომადგენლებიც, რომლებიც აცხადებენ, რომ იმ ქართულ კომპანიებს, რომლებიც მათი მიმწოდებლები არიან, ხარისხის პრობლემა არასდროს ჰქონიათ.


ერთ-ერთი მათგანი ალექსეი შრაინერი, რომელიც ქართული ღვინით უკვე 16 წელია ვაჭრობს, ამბობს, რომ საქართველოში არის უმაღლესი კლასის ღვინო, არის კარგი ხარისხის ღვინო, მაგრამ ისევე, როგორც ნებისმიერ ქვეყანაში, ცალკეულ მწარმოებლებს შესაძლოა, ჰქონდეთ პრობლემები. შრაინერმა სუფთა პოლიტიკა უწოდა რუსული „როსპოტრებნადზორის“ მიერ 24 ივნისს გამოცხადებულ გადაწყვეტილებას, რომ ქართული ალკოჰოლური პროდუქციის ხარისხი გაუარესდა, ამიტომ კონტროლს ამკაცრებს და 8 კომპანიას უკვე აუკრძალა რუსეთში თავისი პროდუქციის შეტანა.


ამ გადაწყვეტილებას წინ უძღოდა თბილისში, რუსეთის დუმის დეპუტატის, სერგეი გავრილოვის წინააღმდეგ მიმართული საპროტესტო აქციები.