ადვოკატის ინფორმაციით, ნიკა მელია პარლამენტშია და მიმალვას არ აპირებს
საქართველოს პარლამენტის წევრის, ნიკა მელიას ადვოკატის, გიორგი კონდახაშვილის ინფორმაციით, ნიკა მელია ამჟამად პარლამენტში იმყოფება, მიმალვას არ აპირებს და მზად არის წარდგეს მართლმსაჯულების წინაშე.
ამასთან, ადვოკატის შეფასებით, მიმდინარე პროცესის მიმართ დიდი კითხვის ნიშნები არსებობს. გიორგი კონდახაშვილი პარლამენტში იმყოფება.
„უნდა ჩავიბარო ბრალდების დადგენილება, თუმცაღა მინდა დავაფიქსირო, რომ აღნიშნულ საქმეში პირველივე წუთიდან არის ძალიან უხეში საპროცესო დარღვევები. გუშინდელს მერე ჩვენ ვთხოვთ პროკურატურას, გადმოგვეცეს მტკიცებულებები, რაზე დაყრდნობით განხორციელდა ბრალდება ნიკანონ მერიასთან მიმართებაში, რაც დღემდე არ გადმოუციათ. ასევე ხაზგასმით მინდა აღვნიშნო, რომ პროკურატურის მიერ პარლამენტში გადაგზავნილ შუამდგომლობაში არის ძალიან ბევრი შეუსაბამო ფაქტები. ისეთ ფაქტებზეა მითითება, რომ თითქოს ნიკანორ მელია მიიმალება, რომ მას აქვს ორი პასპორტი, რომ იგი რამდენჯერმეა საზღვარგარეთ ნამყოფი, ასეთ სამართლებრივ თემატიკას განიხილავს ახლა პარლამენტი. ასევე, გასარკვევია რას გულისხმობს პროკურატურა ორგანიზებაში, მასობრივ არეულობაში, ხელმძღვანელობაში, გადატრიალებაში. უამრავი ჩანაწერი არსებობს, სადაც მელია აცხადებს, რომ მშვიდობიანად, ხელებაწეული, კონსტრუქციულად შევიდეთ პარლამენტის შენობაში და გავაპროტესტოთო. თუკი ამას გულისხმობს პროკურატურა მასობრივ არეულობაში და გადატრიალებაში და ბუნტში, ეს არის სამართლებრივი აბსურდი“, - განუცხადა ჟურნალისტებს გიორგი კონდახაშვილმა.
პარლამენტის საპროცედურო საკითხთა და წესების და იურიდიულ საკითხთა კომიტეტები ერთობლივ სხდომაზე განიხილავენ გენერალური პროკურორის მიმართვას, პარლამენტის წევრის, ნიკა მელიას დაპატიმრებაზე თანხმობის მიცემის შესახებ.
საქართველოს პროკურატურამ 25 ივნისს, საღამოს განაცხადა, რომ 20-21 ივნისს, პარლამენტის წინ გამართულ აქციაზე ჯგუფური ძალადობის ორგანიზების, ხელმძღვანელობისა და მასში მონაწილეობის ფაქტზე მიმდინარე გამოძიების ფარგლებში, საქართველოს პარლამენტის წევრის ნიკა მელიას მიმართ გამოიკვეთა სისხლის სამართლის კოდექსით გათვალისწინებული დანაშაულის ნიშნები.
მელიას მიმართ გამოტანილია ბრალდების დადგენილება ჯგუფური ძალადობის ხელმძღვანელობის და მასში მონაწილეობისთვის.(საქართველოს სისხლის სამართლის კოდექსის 225-ე მუხლის პირველი და მეორე ნაწილებით)
26 ივნისს, ნიკა მელია ბრალდების წარსადგენად გენერალურ პროკურატურაშია დაბარებული.