ემზარ კვიციანი დეპუტატებს მოუწოდებს ნიკა მელიას თავდებში დაუდგნენ

„პატრიოტთა ალიანსის“ წევრი ემზარ კვიციანი დეპუტატებს მოუწოდებს ნიკა მელიას თავდებში დაუდგნენ. პროკურატურას კი მიმართავს და ამბობს, რომ არ არსებობს არანაირი საფუძველი იმისა, რომ ნიკა მელია გამოძიებას დაემალება, რის გამოც მისი დაპატიმრება აუცილებელია.


ეს განცხადება მან პლენარულ სხდომაზე გააკეთა, სადაც დეპუტატებმა დეპუტატებმა კენჭი უნდა უყარონ ნიკა მელიას დაპატიმრებაზე სასამართლოსთვის მისამართად პროკურატურისთვის თანხმობის მიცემას:


„ნიკა მელიას საკითხზე აღძრულია სისხლის სამართლის საქმე. ის გირაოთია გამოშვებული და არ გაქცეულა არსად. დღესაც, აგერ მოვიდა და ზის და გისმენთ. ანუ, ყველა საფუძველი არსებობს იმისა, რომ არ გაიქცევა და რატომ არის აუცილებელი მისი პატიმრობაში ყოფნა? თუ არის იმის საშუალება, რომ დეპუტატები, ვისაც სურვილი ექნება, რომ თავდებში ჩავუდგეთ ნიკანორ მელიას, რომ აიღონ დეპუტატებმა თავის თავზე, რომ ნიკანორ მელია არ გაიქცევა და არ შეუშლის ხელს გამოძიებას. მიუხედავად იმისა, რომ სხვადასხვა პოლიტიკური მიმართულებები გვაქვს, ის არის ჩვენი კოლეგა და ისტორიაში ჩაიწერება, რომ მეცხრე მოწვევის პარლამენტარებმა თავიანთი კოლეგა გაწირეს. რადგანაც მივიღეთ, მოვიყვანეთ და დავსვით, მაშინ კეთილი ვინებოთ და კოლეგიალურობა დავიცვათ. მოვითხოვოთ შინა პატიმრობა, სანამ რ დასრულდება გამოძიება“, - განაცხადა ემზარ კვიციანმა.


პროკურატურა ნიკა მელიას ბრალად სდებს 20-21 ივნისს, საქართველოს პარლამენტთან გამართულ აქციაზე ჯგუფური ძალადობის ორგანიზებაში, ხელმძღვანელობასა და მონაწილეობაში.


ნიკა მელიასთვის იმუნიტეტის მოხსნის გადაწყვეტილებას მხარი დაუჭირა საპროცედურო საკითხთა და წესების კომიტეტის 6-მა წევრმა ერთის წინააღმდეგ და იურიდიულ საკითხთა კომიტეტის 9 წევრმა 3-ის წინააღმდეგ.


ნიკა მელიას დაპატიმრებაზე პროკურატურისთვის თანხმობის მიცემის საკითხის პლენარულ სხდომაზე განხილვას მხარი დაუჭირეს ბიუროს სხდომაზე.


გენერალური პროკურორის მიმართვაზე საბოლოო გადაწყვეტილებას დეპუტატები პარლამენტის პლენარულ სხდომაზე, კენჭისყრის შედეგად მიიღებენ.