ბულგარეთში საპარლამენტო არჩევნები გაიმართა
ბულგარელებმა ხმა მისცეს საყოველთაო არჩევნებში, რომელიც მეოთხეა უკანასკნელი 18 თვის განმავლობაში, მმართველი კოალიციის შექმნასთან დაკავშირებით პარლამენტში მორიგი დაპირისპირებისა და რთული მოლაპარაკებების შემდეგ.
თითქმის 7 მილიონიანი ქვეყანა პოლიტიკურ ჩიხში იმყოფება 2020 წლიდან, როცა მთელ ქვეყანაში საყოველთაო საპროტესტო გამოსვლები გაიმართა, რადგან მრავალწლიანი კორუფციის გამო საზოგადოების რისხვამ ამოხეთქა. ამ უკმაყოფილების დიდი ნაწილი მიმართული იყო ხანგრძლივი ლიდერის, ბოიკო ბორისოვისა და მისი მემარჯვენე-ცენტრისტული პარტიის, "მოქალაქეები ბულგარეთის ევროპული განვითარებისთვის" (GERB), წინააღმდეგ.
უკანასკნელი მთავრობა, რომელსაც კირილ პეტკოვი ხელმძღვანელობდა, ივნისში დაიშალა, მხოლოდ ექვსის თვის შემდეგ, როცა ის კოალიციის ერთ-ერთმა პარტნიორმა დატოვა. პეტკოვი, რომელიც ხელმძღვანელობს რეფორმის მომხრე პარტიას, "ჩვენ ვაგრძელებთ ცვლილებებს" (PP), ცდილობდა შეესრულებინა თავისი პირობა კორუფციის აღმოფხვრის შესახებ.
მან ასევე მხარი დაუჭირა უკრაინას მის ბრძოლაში რუსეთის წინააღმდეგ - ქვეყანაში, რომელსაც ტრადიციულად მეგობრული დამოკიდებულება ჰქონდა მოსკოვის მიმართ და ადანაშაულებს კრემლს, რომ მან დახმარება გაუწია მისი მთავრობის დაშლის ორგანიზებას, მთავრობისა, რომელმაც უარი განაცხადა გაზის საფასურის რუბლებში გადახდაზე, როგორც ამას რუსეთი მოითხოვდა.
კენჭისყრამდე ჩატარებულმა საზოგადოებრივი აზრის გამოკითხვამ აჩვენა, რომ პარტიას "მოქალაქეები ბულგარეთის ევროპული განვითარებისთვის" (GERB) მხარი დაუჭირა 25-26 პროცენტმა, რაც ბევრად უსწრებდა პარტიას "ჩვენ ვაგრძელებთ ცვლილებებს" (PP), რომლის მხარდაჭერა დაახლოებით 16.5 პროცენტს შეადგენდა.
რვა პარტიამ შესაძლოა გადალახოს 4 პროცენტიანი ბარიერი, რომელიც საჭიროა პარლამენტში შესასვლელად და 240-კაციან საკანონმდებლო ორგანოში ადგილების მოსაპოვებლად. ერთ-ერთმა მათგანმა, ულტრამემარჯვენე პარტია "აღორძინებამ", რომელმაც გამოკითხვების თანახმად, ხმების დაახლოებით 11-დან 13 პროცენტამდე მოიპოვა, ისარგებლა პოპულიზმის ტალღით, რომელმაც მოიცვა ევროპა - რაზეც მოწმობს ბოლოდროინდელი წარმატებები ულტრამემარჯვენე პარტიებისა იტალიასა და შვედეთში - რაც გამოწვეულია ეკონომიკური შიშებითა და გაურკვევლობით, რაც ჯერ კოვიდ-19-ის პანდემიამ გამოიწვია, ახლა კი უკრაინაში რუსეთის შეჭრამ.