სააკაშვილი: რუსი წვევამდელების მასობრივი ჩასვლა საქართველოში შეუქმნის დიდ დემოგრაფიულ საფრთხეს ამ პატარა ქვეყანას

საქართველოს ყოფილი პრეზიდენტი მიხეილ სააკაშვილი, რომელიც ექვსწლიან პატიმრობას იხდის საქართველოში, თავის განცხადებაში, რომელიც წვევამდელი ასაკის რუსეთის მოქალაქეების საქართველოში გაქცევას ეხება, აცხადებს, რომ „რუსი წვევამდელების მასობრივი ჩასვლა საქართველოში შეუქმნის დიდ დემოგრაფიულ საფრთხეს ამ პატარა ქვეყანას“.

მიხეილ სააკაშვილი ამბობს, რომ მეორე მხრივ, ის არ არის მზად განსაჯოს „საქართველოს ხელისუფლების გადაწყვეტილება, შეუშვას ისინი, რადგან რაც უფრო მეტი მათგანი ჩავა საქართველოში, მით უფრო ნაკლები უკრაინელი დაიღუპება,“ რაც ყოფილი პრეზიდენტის თქმით, „საქართველოსთვის მნიშვნელოვანია“.

სააკაშვილი, რომელიც საქართველოს პრეზიდენტის პოსტი ეკავა 2004-დან 2013 წლამდე, თვლის, რომ საქართველოს სამოქალაქო საზოგადოებამ „ახლად ჩამოსულებს მუდმივად შეახსენოს, რომ ისინი ოკუპანტები არიან და „მკაცრი მეთვალყურეობა გაუწიონ მათ, არ მოიპოვონ ქართული პასპორტები“, რათა წაერთვათ შესაძლებლობა, ჩაერიონ საქართველოს საშინაო პოლიტიკაში.

სააკაშვილი თვლის, რომ ქართველებმა მათ სტიმული უნდა მისცენ, რომ ისინი მაქსიმალურად წავიდნენ თურქეთსა და სხვა ქვეყნებში.

ერთ-ერთი თავისი გამოსვლისას სასამართლოს პროცესზე, სააკაშვილმა გამოთქვა გაფრთხილება, რომ რუსების მიერ საქართველოში ნაყიდი ბინები, „დაუყოვნებლივ იქნება ჩამორთმეული ქვეყანაში ხელისუფლების შეცვლის შემდეგ“. რადიო თავისუფლების რუსული სამსახურის მონაცემებით, ამ ეტაპზე რუსეთის 23 ათას მოქალაქეს აქვს უძრავი ქონება საქართველოში. მათი უდიდესი ნაწილი შეძენილია ბოლო ექვს თვეში თბილისსა და ბათუმში.

მიხეილ სააკაშვილს თბილისის სასამართლომ ექვსი და სამი წლით პატიმრობა მიუსაჯა თანამდებობრივი უფლებამოსილების გადაჭარბების და ბოროტად გამოყენებისთვის. კიდევ სამი საქმე გამოძიების სტადიაშია. სააკაშვილი ამჟამად მკურნალობის კურსს გადის თბილისის კლინიკა „ვივამედში“.