Кыргызстанда Түрк тилдүү мамлекеттердин кеңеши өтөт

Кыргызстанда Түрк тилдүү мамлекеттердин кызматташтык кеңешинин кезектеги жыйынын даярдоо жана өткөрүү боюнча уюштуруу комитети түзүлдү. Тиешелүү буйрукка президент Сооронбай Жээнбеков кол койду.


Ага ылайык, саммит быйыл 3-сентябрда Чолпон-Ата шаарында өтөт. Уюштуруу комитетин биринчи вице-премьер-министр Кубатбек Боронов жетектейт. Анын курамына өкмөттүн Ысык-Көл облусундагы ыйгарым укуктуу өкүлү жана Чолпон-Ата шаарынын мэри, тиешелүү мекемелердин жетекчилери кирген.


2015-жылы Бишкекте өтчү Түрк тилдүү мамлекеттердин кызматташтык уюмунун саммитин өткөрүү буга чейин улам кийинкиге жылдырылып келген. Анын себептерин расмий Бишкек так түшүндүргөн эмес. Серепчилер аны кыргыз-түрк жетекчилеринин мамилесинин сууп кетиши менен байланыштырып келишкен. (КЕ)