Газадагы аянттын алдында туннелдер аныкталганы кабарланды
Израилдин армиясы Газа шаарындагы Палестина аянтынын алдында ири туннелдер түйүнү аныкталганын билдирди.
“Палестина аянтында Яхья Синвардын кеңсеси, ХАМАС (АКШ менен Евробиримдикте террордук деп таанылган) уюмдун лидерлеринин кыймылсыз мүлктөрү, кеңселер жана террорчулардын туннелдери аныкталды”,- деди ЦАХАЛдын расмий өкүлү Даниэл Хагари.
Анын айтымында, бул туннелдердин Ас-Шифа ооруканасы менен байланышы болгон.
Буга чейин ХАМАС куралдуу тобунун башчысы Яхья Синвар Газа тилкесинин түндүгүндө согуш башталганы гуманитардык кербен менен аймактын түштүгүнө качканын Times of Israel басылмасы өз булактарына таянып кабарлаган.
Маалыматка караганда, ал Хан-Юнис шаарын көздөй иш жашырган. Өткөн жумада Израилдин өкмөт башчысы Беньямин Нетаньяху жөөт армиясы Синвардын үйүн курчоого алганын айткан.
Абу Ибрагим деген ысым менен дагы таанымал 61 жаштагы Синвар Хан-Юнис шаарында туулган. Ал эки жөөт жоокерин өлтүргөн деген айып менен көп жыл Израил түрмөсүндө отуруп, 2011-жылы туткундарды айырбаштоо жараянынын алкагында бошотулган. Газага кайткандан кийин ХАМАС куралдуу тобун жетектеп баштаган.
ХАМАС көзөмөлдөгөн Саламаттык сактоо башкармалыгы согуш башталганы аймакта 18 миң кишинин өмүрү кыйылганын билдирди. Бул санды көз карандысыз булактардан ырастоо мүмкүн эмес.
ХАМАС радикал кыймылы 7-октябрда Израилге кол салып, 1200 кишини өлтүрүп, 240тай адамды барымтага алган. Бул окуядан кийин жөөт армиясы ХАМАСка каршы согуш жарыялап, Газа тилкесине чабуулун баштаган.
БУУ жана бир катар эл аралык уюмдар анклавда гуманитардык кризис күч алганын билдирип, ок атышууну токтотууга чакырып жатат.