Приведена лекарка во Куманово за примање поткуп

Кумановската полиција привело лекарка откако извршила претрес во работните простории на Очно одделение при болницата во Куманово и патничко моторно возило „опел астра“, кое било паркирано во кругот на болницата. Претресот, според соопштението, е извршен поради основано сомнение за примање поткуп и злоупотреба на службената положба од страна на лекарката.

„При претресот во Очното одделение при ЈЗУ Општа болница – Куманово од медицинската сестра одземени се 18.000 денари, а при претрес во возилото, сопственост на  лекарката Е.С. одземени се околу 98.000 денари. Е.С. е приведена и против неа ќе биде поднесена соодветна кривична пријава до ОЈО Куманово“, информира Министерството за внатрешни работи.

Лекарката, како што се наведува,примала поткуп од пациенти, така што правела хируршки интервенции во службени простории на болницата. За интервенциите, според полицијата, противправно земала по 12.000 денари, иако пациентите се здравствено осигурени преку ФЗО и за истата интервенција би требало да платат само партиципација, но партиципација не им била наплатена.

Пациентите, според соопштението, ги давале парите лично на пријавената, пред да се изврши хируршката интервенција, а за што пациентите не добивале документ за платената услуга.