امریکا: روسیې د کیمیاوي وسلو د لهمنځ وړلو له ژمنې سرغړونه کړې
د ده په خبره روسيه نهده توانېدلې چې د دې وسلې د کارونې په برخه کې د سوريې د حکومت مخه ونيسي.
د بېوسلې کولو د کنفرانس لپاره د امريکا دايمي استازي رابرت ووډ دا خبرې نن په ژنيو کې خبريالانو ته وکړې.
تر دې مخکې په نويو راپورونو کې ويل شوي وو چې د سوريې ځواکونو پر ملکيانو کلورين ګاز کارولي، خو د سوريې حکومت دغه ادعاوې رد کړې دي.
ښاغلي ووډ وويل، روسيه په سوريه کې د کيمياوي وسلو د کارونې له کبله د تاريخ په غلطه خوا کې ده.
خو د روسيې د بهرنيو چارو وزير سرګي لاوروف د ملګرو ملتونو په بلنه د بېوسلې کولو دغه کنفرانس ته په وينا کې ټينګار وکړ چې سوريې خپلې کيمياوي وسلې لهمنځه وړي او د نړيوال کنټرول په واک کې يې ورکړې دي.