د کریکټ د غوره لیګ په سیالیوکې نن د کندهار او د ننګرهار لوبډلي مسابقه کوي
ټاکل شوې چې نن ، شنبه د اکټوبر ۶مه ، د افغانستان د کریکټ د غوره لیګ یا پرېمیرلیګ په سیالیوکې د کندهار اتلان او د ننګرهار پړانګان لوبډلې سره مخامخ شي.
دا مسابقه په شارجه کې ده.
د افغانستان د پرېمیرلیګ دریمه مسابقه به هم چې د کابل ځوانانو او بلخ قهرمانانو ترمنځ ده ، نن په شارجه کې وي.
د افغانستان د کریکټ د غوره لیګ په سیالیو کې پینځه لوبډلې ګډون لري چې د کابل ځوانان، د بلخ قهرمانان، دننګرهار پړانګان ، دپکتیا زمریان او د کندهار اتلان دي.
د کابل ځوانان لوبډلې کپټاني راشد خان ، د بلخ د قهرمانانو محمد نبي، د کندهار د اتلانو اصغر افغان، د ننګرهار د پړانګانو اسټرالیایی ال رونډر بین کټینګ او د پکتیا زمریانو کپټاني محمد شهزاد کوي.
د افغانستان د کریکټ د غوره لیګ سیالۍ درې اونۍ دوام کوي.
د دې لړۍ په لومړۍ سیالي کې چې پرون په شارجه کې د کابل ځوانانو لوبډلې په دریو وېکټونو د پکتیا زمریانو لوبډلې ته ماته ورکړه.
د کابل ځوانانو کرکټر، لوري ایوانس د پرونۍ سیالۍ غوره لوبغاړی وټاکل شو.