پوهنې وزارت د یوې اوونۍ لپاره دولتي ښوونځي رخصت کړل
د دغه وزارت د نشراتو رئیس کبیر حقمل نن ازادي راډیو ته وویل د انتخاباتو له خپلواک کمېسیون سره له مخکې تړون شوی چې زیاتر انتخاباتي حوزې به په ښوونځیو کې وي، نو د زده کوونکو د ژوند د خوندیتوب لپاره دغه اقدام شوی:
"د دې لپاره چې په ډېری ښوونځیو کې انتخاباتي حوزې جوړېږي، له انتخاباتو سره د همکارۍ له مخې او د زده کوونکو د نه مزاحمت له امله سر له سبا تر بلې دوشنبې ټول دولتي ښوونځي رخصتېږي."
ښاغلی حقمل زیاتوي چې یوازې دولتي ښوونځي به رخصتیږي نه شخصي.
د افغانستان د ولسي جرګې انتخابات د مېزان په ۲۸ ترسره کېږي چې امنیتي ارګانونه وايي سر له نن یې انتخاباتي حوزو کې د ښه امنیت په هدف امنیتي سرتېري ځای پرځای کړي.