چین له پاکستان سره د اقتصادي مرستې ژمنه کړې
دا ژمنه د چین ولسمشر شي جین پېنګ نن په پېکېنګ کې د پاکستان له صدراعظم عمران خان سره په کتنه کې وکړه.
عمران له شي جین پېنګ سره په خبرو کې د پاکستان اقتصادي حالت ډېر سخت بللی دی.
پاکستان لا دمخه له چین څخه میلیاردونه ډالر پور اخيستی او عمران غواړي چې چین له روان مالي بحران څخه د پاکستان د وتلو لپاره نوره مرسته هم وکړي.
که څه هم سعودي عربستان تېره میاشت د پاکستان د اقتصاد د ژغورولو په هدف دغه هېواد ته د ۶ میلیاردو ډالرو په ورکولو موافقه وکړه، خو اسلام اباد وايي، دا پیسې کافي نه دي او غواړي چې د پیسو له نړیوال صندوق یا ای ایم ایف څخه هم پور واخلي.
د چین ولسمشر ویلي دي چې هېواد يې له پاکستان سره اړیکو ته زیات ارزښت ورکوي او پېکېنګ او اسلام اباد د هر حالت ملګري دي.