ډونالډ ټوسک د اروپايي سرمشریزې د جوړېدو غوښتنه کړې ده

د اروپايي ټولنې مشر ډونالډ ټوسک د روانې نوومبر میاشت په ۲۵مه نېټه د اروپايي سرمشریزې د جوړېدو غوښتنه کړې ده چې له دې اتحاديې څخه د بریتانيې د وتلو معامله تأیید کړي.


ډونالډ ټوسک نن وویل، که کومه فوق‌العاده پېښه ونه‌شي نو د اروپايي شورا غونډه به جوړه کړي چې له دې ټولنې څخه د بریتانيې د وتلو معامله نهايي کړي.


تردې یوه ورځ مخکې د اروپايي ټولنې مرکچي او د بریتانيې صدراعظمې ټرزا مې اعلان وکړ چې له اروپايي اتحاديې څخه د بریتانيې د وتلو په یوه ۵۸۵ مخیزه مسوده يې موافقه کړې ده.


د بریتانيې خلکو د ۲۰۱۶میلادي کال د جون د ۲۳مې په ټولپوښتنه کې له اروپايي ټولنې څخه وتلو ته رأیه ورکړه.