په افغانستان کې له جنورۍ راهیسې ۳ لکه کسان جګړو بې کوره کړي

ملګرو ملتونو نن سې شنبه په یوه راپور کې ویلي چې په افغانستان کې له جنورۍ راهیسې درې لکه افغانان د جګړې له امله بې کوره شوي دي.


په افغانستان کې د ملګرو ملتونو د بشري مرستو د هماهنګۍ ادارې په رپوټ کې ویل شوي چې یوازې د غزني په ښار او شااوخوا سیمو کې ۲۵۱۱ کورنۍ د روانې جګړې له امله بې کوره شوي دي.


د دې ادارې په وینا، د افغانستان په وردګ، بغلان، ننګرهار او هلمند کې په وروستیو لسو میاشتو کې تقریباً دوه نیم لکه کسان جګړې بې کوره کړي دي.


دې سازمان همدا راز اندېښنه ښودلې چې غیر دولتي وسله والې ډلې له مرسته رسوونکو ادارو په غیرقانوني ډول پېسې غواړي او محتاجو خلکو ته د مرستې رسولو بهیر له خنډ سره مخ کوي.