د سولې نړيواله ورځ: ملګري ملتونه وايي د جنس په بنياد دې توپيري چلند مه کوئ
د سيپتمبر ۲۱مه هر کال د امن د نړیوالې ورځې په توګه لمانځل کېږي. ملګرو ملتونو پر خپله وېبپاڼه د دې ورځې په مناسبت لیکلي، باید د یوې داسې ټولنې د جوړولو لپاره کار وشي چې پکې د ټولنې هر وګړی او هر اوسېدونکی خپل ښه راتلونکی او روښانه مستقبل وویني او له چا سره هم د صنف او جنس پر بنیاد توپيري چلند ونه شي.
خو سږ کال په خيبر پښتونخوا کې دا ورځ په داسې حال کې لمانځل کېږي چې هلته خلک د ناامنۍ د پېښو خلاف احتجاجونه کوي او پر خپله خاوره د امن غوښتنه کوي. بلخوا په افغانستان کې د طالبانو د حکومت یو کال تېرېدو باوجود په زیاترو سیمو کې تر شپږم ټولګي پورته د جینکو سکولونه او تعلیمي ادارې بندې دي او ښځې نه شي کولای خپل کار و روزګار د پخوا په شان وکړي. په دې اړه زمونږ همکاره فرخنده اسد نور تفصیل وړاندې کوي.