Sulmuesja e dyshuar në YouTube gjendet e vdekur
Shefi i policisë në San Bruno, Ed Barberini, tha se një grua që besohet të jetë sulmuesja, është gjetur e vdekur në ndërtesë me “plagë të vetëshkaktuara”.
Policia nuk dha më shumë informacione mbi të dyshuarën apo mbi motivet e saj për të shtënat.
Gjendja e të plagosurve që janë dërguar në spital, nuk është e qartë.
Ambulancat janë në vendngjarje dhe autoritetet paralajmëruan publikun që të qëndrojë jashtë zonës.
Google, që ka në pronësi YouTube, tha se po koordinohet me autoritetet.
“Ne vazhdojmë të koordinohemi në mënyrë aktive me autoritetet dhe spitalet lokale. Ekipi ynë i sigurisë ka punuar nga afër me autoritetet për të evakuuar ndërtesën dhe për të garantuar sigurinë e punonjësve në zonë”, tha gjiganti i kërkimeve në internet, Google.
Rreth 1,700 njerëz punojnë në zyrën qendrore të YouTube.
Pamjet e transmetuara në stacionet televizive i treguan punonjësit duke u larguar me duart e tyre të ngritura.
Menaxheri i produktit në YouTube, Todd Sherman, shkroi në Twitter se njerëzit kanë ikur në panik.
Muajin e kaluar, YouTube ka thënë se do të ndalojë përmbajtjen që promovon shitjen e armëve, si dhe videot që mësojnë se si të bëhen armë.
Përgatiti: Valona Tela