Шаш даста дар чорякфинали қаҳрамонии футболи Осиё
Дар мусобиқаи қаҳрамонии футболи Осиё миёни ҷавонони то 23-сола, ки дар Тайланд ҷараён дорад, шаш даста – Австралия, Тайланд (гурӯҳи «А»), Арабистони Саудӣ, Сурия (гурӯҳи «В»), Кореяи Ҷанубӣ, Узбекистон (гурӯҳи «С») - ба чорякфинал роҳ пайдо карданд.
Ду дастаи дигари ширкаткунандаи даври чорякниҳоӣ баъди натиҷагирии бозиҳои даври охирин дар гурӯҳи «D» шоми имрӯз, 16-уми январ, маълум хоҳанд шуд. Ҳоло дар ин гурӯҳ дастаҳои мунтахаби Имороти Муттаҳидаи Арабӣ ва Урдун бо чоримтиёзӣ мутаносибан дар ҷойҳои якуму дувум қарор доранд. Мунтахаби Ветнам бо ду имтиёз дар ҷойи севум аст. Ин се даста барои ду роҳхат ба чорякфинал талош мекунанд.
Вале мунтахаби Кореяи Шимолӣ, ки имтиёз нагирифтааст, сарфи назар аз натиҷаи бозии охиринаш бо Ветнам аз ҳаққи ширкат дар даври баъдӣ маҳрум гашт. Бозии дигари даври севум миёни ду дастаи пешсаф - Имороти Муттаҳидаи Арабӣ ва Урдун – доир мегардад.
Бозиҳои чорякниҳоии қаҳрамонии Осиё (U-23) 19-уми январ, бозиҳои ниманиҳоӣ 22-юми январ, бозӣ барои ҷойи сеюм 25-уми январ ва бозии ниҳоӣ 26-уми январ баргузор мешаванд.
Бояд гуфт, ки ҷоизадорони қаҳрамонии футболи Осиё (U-23) дар Тайланд ба ҳаққи ширкат дар Олимпиадаи соли 2020 дар Токио мушарраф хоҳанд шуд.
Ёдовар мешавем, дастаи мунтахаби олимпии футболи Тоҷикистон (U-23) таҳти раҳбарии Усмон Тошев, мутахассиси узбекистонӣ, дар мусобиқаи интихобии қаҳрамонии Осиё-2020 дар гурӯҳи "F", ки моҳи марти соли гузашта дар Тошканд бо иштироки се дастаи мунтахаб доир гардид, аз роҳхат ба марҳилаи ниҳоӣ бенасиб монд.
Мунтахаби Тоҷикистон дар нахустин бозиаш тими Ҳиндустонро бо ҳисоби 2:0 мағлуб карда, бозии дувумашро бо дастаи мизбон - Узбекистон - бо ҳисоби 0:0 анҷом дод.
Дастаҳои Узбекистон ва Тоҷикистон чоримтиёзӣ гирифтанд. Аз рӯи таносуби беҳтари тӯбҳо мунтахаби Узбекистон дар гурӯҳи “F” ҷойи аввалро касб намуда, ба марҳилаи ниҳоии қаҳрамонии Осиё-2020 роҳ пайдо кард.