ABŞ resmileri Türkiýäniň rus raketa ulgamyny satyn almak planlaryndan el çekmäge çagyrdylar

ABŞ-nyň ýokary derejeli syýasatçylarynyň topary Türkiýä ýüzlenip, Ankaranyň Russiýanyň S-400 raketa hüjüminden goranyş ulgamyny satyn almak baradaky planlaryndan el çekmäge çagyrdy. Günbatar güýçleri munuň NATO ulgamlary bilen utgaşmaýandygyny, şeýle-de ABŞ-nyň öndürýän harby uçarlaryna howp abandyrýandygyny aýdýarlar.


Wekiller öýüniň Daşary Gatnaşyklar boýunça komitetiniň demokratik ýolbaşçysy Eliot Engel we respublikan agzasy Maýkl MakKaul (Michael McCaul) 15-nji maýda beýanat ýaýradyp, Kongresiň prezident Rejep Taýyp Erdoganyň NATO-nyň möhüm ýaranyny alyp barýan ugruna alada bildirýändigini” bellediler.


“Wladimir Putine ýaranjaňlyk etmek kabul ederliksizdir. Eger-de, Erdogan Russiýanyň S-400 ulgamyny almak ugrundaky hereketlerini dowam etdirse, ABŞ-nyň Kongresi elini gowşuryp oturmaz. Bu kanun Erdogana açyk habary ýollaýar: eger-de şu ýoluňy dowam etdirseň, agyr netijeler bilen ýüzbe-ýüz bolarsyň” diýip, MakKaul belledi.


ABŞ Ankarany rus raketa ulgamyny satyn almak planlaryndan el çekmäge çagyrypdy. NATO agzalary hem munuň ABŞ-nyň öndürýän F-35 harby uçarlaryna howp abandyryp biljekdigine alada bildiripdiler.