Ижевскида Удмуртия татар иҗтимагый үзәге татар теле курслары ачкан

(Казан, 17 декабрь, «Татар-информ»). 14 декабрьдә Ижевск шәһәренең Халыклар дуслыгы йортында Удмуртия татар иҗтимагый үзәгенең чираттагы корылтае узды. Анда Туган телне өйрәнү буенча курслар оештырылуы турында да сүз барды. Бу турыда Бөтендөнья татар конгрессы хәбәр итә.

Татарлар яшәгән төбәкләрдән милли җанлы, үз халкы белән горурланган, телебезне, гореф-гадәтләребезне саклап калуда, иманыбызны ныгытуда зур көч куйган шәхесләр җыелды.

Удмуртия татар иҗтимагый үзәге соңгы өч елда башкарылган эшләренә хисап тотты. Туган телне өйрәнү буенча курслар оештырылган, «Зәңгәр шәл» театр фестивале зурлап уздырылган, яшь талантларны барлау максатыннан «Язгы тамчы» музыка уен коралларында уйнаучы балалар бәйгесендә Удмуртиядән тыш Татарстан һәм Пермь краеннан да музыка серләренә төшенүче балалар катнашкан.

Бик куп чаралар милли-мәдәни автономия белән берлектә уздырылган. Чыгыш ясаучылар республикадагы барлык милли оешмалар, телевидение, радио һәм газета хезмәткәренең уртак тел табып бергә эшләүләрен әйтте.

Соңгы елда мәктәпләрдә татар теле дәресләре сәгатьләре кыскартыла, әмма туган телебезне өйрәнүгә ихтыяҗ зур. Хәзер мәчетләрдә оештырылган татар теле курсларына күпләп кеше олылар һәм балалар килүен билгеләп үттеләр Ижау Жәмигъ мәчете имамы Исмәгыйль хәзрәт Шәйхетдинов һәм Үзәк мәчете имамы Надир хәзрәт Бузанаков.

Алар дини йолаларыбызны көндәлек тормышта үтәп яшәргә өндәде. Чыгыш ясаучылар Ижевск шәһәрендэ татарларның милли-мәдәни үзәген булдыруны кабат күтәрде. Корылтай делегатлары төрле бәйгеләрдә җиңү яулаган Ильяс Бэдретдинов башкаруында Туган тел җыры белән төгәлләнде. Делегатлар күңеленә үзешчән сәнгать осталары концерты хуш килде.