Миңнеханов: Ковидтан вакцинация ясарга кирәклеге турында сак аңлатырга кирәк
(Казан, 25 декабрь, «Татар-информ»). Коронавирустан вакцинация кирәклеге турында халыкка максималь рәвештә сак аңлатырга кирәк, бу эштә бернинди арттырып җибәрүләр булмаска тиеш. Бу хакта Татарстан Президенты Рөстәм Миңнеханов ТР Хөкүмәте Йортында шимбә киңәшмәсендә белдерде.
Кичә республика җитәкчесе Алабуга мэры Рөстәм Нуриевның коронавирустан прививка ясатмаган пенсионерлар адресына әйткән сүзләрен ярамый торган хәл дип атады.
«Вакцинация өчен урыннарда җаваплы кешеләрдән үз эшләрен акыл белән һәм бик уйлап башкаруларын үтенәм. Мин хезмәттәшебез белән сөйләштем, ул үз гамәлен аңлады, рәсми рәвештә гафу үтенде. Мин үзем дә олылар алдында булган хәлләр өчен гафу үтенергә телим. Болай әйтергә ярамый «, — диде Рөстәм Миңнеханов.
Аның сүзләренчә, Россиядә өлкән буынга һәрвакыт зур хөрмәт белән караганнар.
«Әйе, коронавирустан үлем очракларының 85 проценты 60 яшьтән өлкәнрәк кешеләргә туры килгәнен күрәбез. Аларга прививка ясатырга кирәк. Әмма без боларның барысын да сабыр гына аңлатырга, дәлилләр китерергә, һәркем белән аерым сөйләшергә тиеш», — диде республика Президенты.
Һәрбер кешегә карата шундый мөнәсәбәт күрсәтергә кирәк, дип өстәде ул.
«Һәр кеше — ул шәхес. Кешеләрне кимсетергә безнең бернинди хокукыбыз юк», — дип китерә республика җитәкчесенең сүзләрен аның матбугат хезмәте.