Туркияда аҳвол ёмонлашмоқда
Туркия дунёнинг коронавирус энг кўп тарқалган олтита давлатидан бири бўлиб турибди. Ҳозиргача мамлакатда «COVID»га чалинганлар жами сони беш миллионга яқинлашган. Ўлим кўрсаткичи эса 39 мингдан ортган.
Аммо энг ёмони, кундалик кўрсаткичлар 37 мингдан ошяпти. Эрдўғон бу миқдорни 5 мингтага пасайтириш ниятида. Шу мақсадда Туркияда эртадан тўлиқ карантин амал қила бошлайди.
«Би-би-си»нинг ёзишича, бизнеслар ёпилади, мактаблар онлайн таълимга ўтади, саёҳатлар, жамоат транспортларидаги йўловчилар сони кескин чекланади ва одамларнинг ўта заруриятсиз кўчага чиқишлари тақиқланади.
Бир шаҳардан иккинчисига фақат махсус рухсатнома билан бориш имконияти қолдирилган. Фақат фавқулодда хизмат ходимлари, озиқ-овқат ва ишлаб чиқариш саноати ишчилари бу каби чекловлардан холи.
Президент Эрдўғаннинг таъкидлашича, қатъий чекловларга қўл урилмаса ва касалланиш даражаси пасаймаса, Европа қайта очилаётган пайтда бунинг туризм, савдо ва таълим учун «бадали жуда оғир бўлади».
Шу пайтгача мамлакатда 8 миллион киши коронавирусга қарши тўлиқ эмланган. Аммо натижалари ҳали қониқарли эмас.
Туркияда пайшанбадан спорт заллари ва сузиш ҳавзалари ишламайди, тўйлар ўтказилиши маън этилган. Таровеҳ намозларини жамоат бўлиб ўқиш, оммавий ифторликлар, емакхоналар фаолияти тақиқланган.
Чекловлар Туркиянинг барча вилоятларида бирдек амал қилади.
platformauzb