Фарғонада Ўзбекистон, Тожикистон ва Қирғизистоннинг чегарадош вилоятлари ҳокимлари тарихий форум ўтказди
Ўзбекистоннинг Фарғона вилояти ҳокими Қирғизистон ва Тожикистоннинг қўшни вилоятлари ҳокимлари билан учрашиб, иқтисодий ҳамкорлик масаласини муҳокама қилди.
Фарғона шаҳрида Хайрулло Бозоров мезбонлик қилган ушбу учрашувда Тожикистоннинг Сўғд вилояти губернатори Ражаббой Аҳмадзода ва Қирғизистоннинг Боткен вилояти губернатори Омурбек Суваналиевлар иштирок этди.
Уч мамлакат мустақил бўлганидан бери ўтган қарийб 30 йил давомида учта қўшни вилоят раҳбарлари бирор марта учрашмаган эди.
Учала вилоят ҳам аҳоли зич яшайдиган Фарғона водийсида жойлашган бўлиб, водий мустақиллик йилларида контрабанда йўлига айланди, унда қонли зўравонликлар содир бўлди.
Расман “Чегара интеграцияси – Ривожланиш калити” деб номланган бизнес-форумнинг қизиқарли жиҳатларидан бири шундаки, у чегарани белгилаш эмас, балки савдо ва маданий алоқалар ҳақида бўлди.
Суваналиев Озодлик радиосининг қирғиз хизматига “чегарани аниқлаш масаласи ҳал қилинар экан, биз иқтисодий алоқаларни ҳам мустаҳкамлашимиз керак”, деди.
Ҳоким давлат чегараларини белгилаш “ҳукуматлараро делегацияларнинг иши” эканини қўшимча қилди.
Учала ҳоким ҳам маҳаллий саноат ва қишлоқ хўжалиги корхоналари делегациялари билан қатнашди. Шунингдек, анжуманда уларнинг маҳсулотлари кўргазмаси уюштирилди.
Хабарларга кўра, фақат Фарғона ва Сўғд вилоятлари ўртасида ҳамкорлик меморандуми имзоланган.
Ушбу муҳим бизнес форумни ўтказиш учун Ислом Каримов номидаги театр танлангани қизиқ ҳолатдир.
Каримов президентлиги даврида Ўзбекистоннинг Қирғизистон ва Тожикистон билан чегаралари бўйлаб тиканли тўсиқлар ўрнатилган ва ариқлар қазилган.
2000 йил ёзида исломий жангарилар минтақага бостириб кириши ортидан Ўзбекистон ҳатто икки қўшниси билан чегарадош ҳудудларга мина қўйди.
Каримов 2016 йил вафот этган пайтда ўзбек қўшинлари Қирғизистоннинг айрим ҳудудларини эгаллаб турган эди.
Унинг ўрнини эгаллаган Шавкат Мирзиёев бу қўшинларни тезда олиб чиқиб кетди.
Шунингдек, Мирзиёев Каримовнинг Қирғизистон ва Тожикистонга нисбатан сиёсатини бекор қилди. Бугунга кунда ўзбек расмийлари ва ишбилармонлари делегациялари қўшни мамлакатларга тез-тез хизмат сафарлари билан бориб туради.
Минтақадаги чегараларни белгилаш ва демаркация қилиш йўлида айрим ютуқларга эришилган бўлишига қарамай, келгуси йилларда чегара муаммоси долзарб масала бўлиш қолишини кутиш мумкин.
Форумдан кўп ўтмай – 28-29 апрель кунлари Қирғизистон билан Тожикистон чегарасида аҳоли ўртасида можаро юз берди.
Чегара бўйича музокаралар давом этар экан, иқтисодий алоқаларнинг яхшиланиши музокараларни олдинга силжитишга кўмаклашиши мумкин.