Эрталаб юзда шишларсиз уйғониш учун кечки овқатга нима истеъмол қилиш керак?
Эрталабки шиш муаммоси барчага яхши маълум. Баъзиларда тунги зиёфат туфайли, бошқаларда эса ҳар куни ва ҳеч қандай сабабсиз ҳам шиш кузатилади. Дарҳақиқат, танада суюқлик тўпланиш сабаблари жуда кўп бўлиши мумкин: нотўғри овқатланиш, гормонал номутаносиблик, ёмон уйқу ёки сувсизланиш. Шифокор, албатта, шиш пайдо бўлишининг сабабини аниқлашга ёрдам беради.
Кўпинча шиш кечаси истеъмол қилган маҳсулотдан келиб чиқади. Эрталаб шишнинг олдини олиш ёки камайтириш учун диетологлар ётишдан 2-3 соат олдин кечки овқатни тановул қилишни тавсия қилади. Албатта, идеал ҳолда кечки овқатдан бутунлай воз кечиш яхшироқдир, лекин ҳар қандай инсон ҳам соғлом одатлар ва қоидаларни бузади. Агар шароитлар кечки овқатдан бош тортишга имкон бермаса, суюқлик ва кўп тузни ўз ичига олмайдиган маҳсулотлар тавсия этилади.
Гречка
Туз ва зираворларсиз қайнатилган гречка шишсиз уйғонишни истаганлар учун айни муддаодир. Клетчаткага бой гречка, бундан ташқари танадан токсинларни олиб ташлайди ва тезда тўқлик ҳиссини беради.
Олма
Олма витаминларнинг ҳақиқий омбори ва шишмаслик учун ажойиб воситадир. Бу мазали мева клетчатка, органик кислоталар, полифенол антиоксидантлар, калий, темир, йод, C ва B витаминлари ва бошқа озиқ моддалар, минералларга бой. Улар ортиқча суюқлик ва токсинларни олиб ташлайди ва бундан ташқари, овқат ҳазм қилишни яхшилайди.
Петрушка
Умуман олганда, ҳар қандай кўкатлар шишларга қарши курашда ёрдамчи ҳисобланади. Аммо петрушка алоҳида эътиборга лойиқдир, бу танадан ортиқча суюқлик ва токсинларни олиб ташлайди ва шу билан шишни енгиллаштиради. Кечки овқат учун петрушкадан енгил салат ёки смузи тайёрлаш мумкин.
Қуритилган ўрик
Қуритилган ўрик диуретик таъсирга эга ва токсинлар билан бирга суюқликни танадан чиқариб ташлайди. Бир неча соат ичида шишни енгиллаштирадиган қуритилган ўрикларнинг шарбатлари айниқса фойдалидир.
Булғор қалампири
Булғор қалампирида тананинг тўғри ишлаши учун зарур бўлган кўплаб витаминлар ва минераллар мавжуд. Магний ва калийга бой қизил қалампир, айниқса, шиш билан курашишда яхши. Шунингдек, маҳсулот таркибидаги микроэлементлар танадан ортиқча суюқликни олиб ташлаш учун масъул.