Бу Cyberpunk 2077 эмас: Хитойда қўлга олинган шахсни мустақил равишда жиноятда айблай оладиган сунъий интеллект яратилди
Хитой сунъий интеллектдан фойдаланган ҳолда дунёдаги биринчи «прокурор» дастурни яратди — у жиноий ишни ўрганиб чиқиб, айблов қўйиш тўғрисида мустақил қарор қила олади. Бу ҳақда South China Morning Post хабар берди.
Дастур Шанхай прокуратураси буюртмасига биноан Хитой Фанлар академияси олимлари томонидан яратилган. Сунъий интеллектга 2015 йилдан 2020 йилгача кўриб чиқилган 17 мингта иш ўргатилган. Ишлаб чиқувчиларнинг маълум қилишича, дастур иш материаллари билан танишиш, уларни мингга яқин параметрлар бўйича таҳлил қилиш асосида 97 фоиз ҳолларда айблов қўйиш бўйича тўғри қарор қабул қила олади.
Хитой прокуратураси 2016 йилдан бери сунъий интеллектдан кенг фойдаланмоқда: «Тизим 206» номи билан танилган дастур айбдорлик далилларининг ишончлилигини ва жиноятда айбланувчининг жамият учун хавфлилик даражасини баҳолайди ҳамда эҳтиёт чорасини танлаш бўйича тавсиялар беради, аммо якуний қарор барибир прокурорда қолади.
«Тизим 206» дан фарқли ўлароқ, янги ишланма жараённи бутунлай инсон аралашувисиз синчиклаб текшириши мумкин.
Ҳозирча дастур Шанхай судлари энг кўп шуғулланадиган саккиз турдаги жиноятларни кўриб чиқа олади: банк карталаридан пул ўғирлаш, ноқонуний қимор ўйинлари, автомобилларни хавфли ҳайдаш, қасддан жароҳатлаш, ўғирлик, фирибгарлик, хизмат вазифаларини бажаришга тўсқинлик қилиш ва «кўнгилсизлик келтириб чиқариш». South China Morning Post газетасининг таъкидлашича, охирги айбловдан кўпинча диссидентларни таъқиб қилишда фойдаланилади.
Ишлаб чиқувчиларнинг режасига кўра, келажакда дастур камроқ учрайдиган айбловларни таний олади, шунингдек, битта гумондорга нисбатан бир нечта айбловларни қўйиши мумкин бўлади. Уларнинг фикрича, дастур прокуратура ходимларини оддий ишлардан озод қилишга ёрдам беради, уларнинг диққатини жиддийроқ муаммоларга қаратишга имкон беради.
Тизим танқидчиларининг таъкидлашича, сунъий интеллект томонидан айбловларни тақдим этишда хатолик юзага келиши эҳтимоли жуда юқори ва бу ҳолатда ҳар бир ишда айнан кимни — прокурор ёки алгоритмнинг ишлаб чиқувчисини жавобгарликка тортиш кераклиги ноаниқ. Бундан ташқари, сунъий интеллект ишни фақат аввал юз берган ҳолат намунаси асосида таҳлил қилади ва ўзгарган ижтимоий шароитларга мослаша олмаслиги мумкин.
Хитой ҳукумат органлари сунъий интеллектдан фойдаланиш бўйича дунёда етакчи ҳисобланади. Мисол учун, Хитойнинг баъзи шаҳарларида сунъий интеллект потенциал коррупцияни аниқлаш учун давлат хизматчиларининг мулоқот доираларини ўрганади. Кўпгина қамоқхоналарда дастурлар зўравонлик даражасини пасайтириш учун маҳкумларнинг жисмоний ва руҳий саломатлигини назорат қилади. Судьялар апелляцияни қаноатлантириш ёки рад этиш тўғрисида қарор қабул қилишда сунъий интеллект билан маслаҳатлашади. Бундан ташқари, бутун мамлакат бўйлаб фуқароларни тўлиқ кузатиш учун сунъий интеллект тизимлари қўлланилади.