Шахмат. Синдоров блиц бўйича баҳсларни 8-ўринда якунлади, Абдусатторовга кубок топширилди — Бизга қўшилинг: ???? https://t.me/joinchat/AAAAADwt0NGCRoONT4f1_Q

Фото: Chess.com Польшада шахмат бўйича жаҳон чемпионати баҳслари якунланди. 30 декабрь куни мусобақанинг блиц йўналишида ҳам ғолиблар аниқланди. Ўйинлар бошида етакчиликни қўлга олган ўзбекистонлик 16 ёшли шахматчи Жавоҳир Синдоров якунда 13,5 очко жамғариб, жаҳон чемпионатини 8-ўринда якунлади. Рейтинг очколари сонини 2452 тага етказиб олган ўзбекистонлик ёш шахматчи ўзига хос натижа қайд этди. Жаҳон чемпионатини дастлабки 48 та поғонада якунлаган спортчилар ичида Синдоров энг қуйи сараланган рақамда (133) иштирокини бошлаганди. Норвегиялик шахмат қироли Магнус Карлсен бу гал ҳам ўзбекистонлик шахматчидан кейинги ўринни эгаллади. Блицда Карлсен биринчи рақамда иштирокини бошлаб, мусобақани 11-ўринда якунлади. Блиц баҳсларида франциялик Максим Ваши-Лаграв чемпион бўлди. Иккинчи ўринни мезбон Ян Кристоф Дуда, учинчи ўринни Франция шарафини ҳимоя қилган Алиризо Фирузжа қўлга киритди. Рапид йўналишида чемпион бўлган Нодирбек Абдусатторовнинг блицдаги баҳслари муваффақиятсиз чиқди - 12 очко билан 47-ўрин, Шамсиддин Воҳидов эса 10,5 очко жамғарган ҳолда 90-ўринни банд этди. Маълумот учун, блиц баҳсларида 180 нафар шахматчи ғолиблик учун кураш олиб борди. Мусобақа соврин жамғармаси 350 000 долларни ташкил этиб, шундан 1-ўрин учун 60 000 АҚШ доллари, 2-ўрин учун 50 000 АҚШ доллари ва 3-ўрин учун эса 40 000 АҚШ доллари ажратилган. 8-ўринни эгаллаган Жавоҳир Синдаров 14 000 АҚШ долларига эга бўлди. Эслатиб ўтамиз, Варшавада бўлиб ўтган тезкор шахмат (рапид) бўйича жаҳон чемпионатида 17 ёшли ўзбекистонлик Нодирбек Абдусатторов ғалаба қозониб, мусобақа тарихидаги энг ёш чемпион бўлган эди. 30 декабрь куни шахматнинг рапид ва блиц йўналиши бўйича жаҳон чемпионати ғолибларини тақдирлаш маросими бўлиб ўтди. Унда Абдусатторов шоҳсупа тепасига кўтарилди ва кубок ҳамда медални қабул қилиб олди. Унинг шарафига Ўзбекистон мадҳияси янгради. Барча совриндорлар рўйхати: Рапид бўйича 1. Нодирбек Абдусатторов 2. Ян Непомняший 3. Магнус Карлсен Аёллар 1. Александра Костенюк 2. Бибисара Асаубаева 3. Валентина Гунина Блиц бўйича 1. Максим Вашье-Лаграв 2. Ян-Кшиштоф Дуда 3. Алиризо Фирузжа Аёллар 1. Бибисара Асаубаева 2. Александра Костенюк 3. Валентина Гунина