ხმაური ჯანდაცვის სამინისტროში – დიაბეტიანი ბავშვების მშობლები მინისტრთან შეხვედრას ითხოვენ

დიაბეტის მქონე ბავშვებისთვის ინსულინის პროგრამაში არსებული ხარვეზების გამოსწორების მოთხოვნით, უწყებასთან აქცია გამართეს მშობლებმა, შემდეგ კი მინისტრ ზურაბ აზარაშვილთან შეხვედრის მოთხოვნით შენობაში შევიდნენ. პროტესტის ამსახველ კადრებს მოქალაქე მარიამ ხუნწარია სოციალურ ქსელში ავრცელებს.

როგორც მოქალაქე წერს, პროტესტის მონაწილეების მოთხოვნაა, მინისტრმა მათ პასუხი გასცეს ინსულინის დეფიციტზე. ამასთან, არსებული ინფორმაციით, დიაბეტიანი ბავშვების მშობლებს პრეტენზიები აქვთ ნემსების სპეციალური თავების დეფიციტთან და სხვა საკითხებთან დაკავშირებით.

“ამ წუთებში შეხვედრა მიმდინარეობს მშობლებსა და სამინისტროს წარმომადგენლებს შორის… მინისტრი არაა, სამინისტროს წარმომადგენლები იმყოფებიან და ის ადამიანები, რომლებიც ამ კონკრეტული მიმართულებით მუშაობენ, ხოლო მშობლების მხრიდან, მათივე გადაწყვეტილებით ვინც შეირჩა, ის ადამიანები ესწრებიან შეხვედრას”, – აცხადებენ უწყების პრესცენტრში.

ამ ეტაპზე სამინისტროში განმარტებას არ აკეთებენ უშუალოდ იმ პრობლემებზე, რომლებზეც მშობლები მიუთითებენ. სამინისტროში ჯერ არც იმას აკონკრეტებენ, გეგმავს თუ არა უწყება ამ თემაზე ოფიციალური განცხადების გავრცელებას.