კრემლი: ნატო არის მტრული ორგანიზაცია, ის სულ უფრო მეტად ერთვება უკრაინის კონფლიქტში
კრემლის თქმით, ნატოს სამხედრო ალიანსი გამუდმებით ავლენს მტრულ დამოკიდებულებას რუსეთის მიმართ და სულ უფრო და უფრო მეტად ერთვება უკრაინაში მიმდინარე კონფლიქტში.
„ნატო არის ჩვენ მიმართ მტრული ორგანზაცია, რომელიც ყოველდღე ავლენს ამ მტრულ დამოკიდებულებას,“ განუცხადა 14 თებერვალს კრემლის პრესსპიკერმა დმიტრი პესკოვმა.
მოსკოვის თანახმად, ნატოს წევრი ქვეყნების მიერ უკრაინისთვის იარაღის მიწოდება კონფლიქტის გაჭიანურებას იწვევს და ზრდის მისი შემდგომი ესკალაციის შესაძლებლობას.
კიევი და დასავლეთი აცხადებენ, რომ მოწინავე სამხედრო ტექნიკის მიწოდებას უკრაინისთვის სასიცოცხლო მნიშვნელობა აქვს რუსეთის აგრესიისგან თავის დასაცავად.
სამშაბათს და ოთხშაბათს ბრიუსელში იმართება ნატოს წევრი სახელმწიფოების თავდაცვის მინისტრების შეხვედრა, რომლის დღის წესრიგშია ალიანსის შეკავების და თავდაცვის პოტენციალის გაძლიერება, უკრაინის შემდგომი დახმარება და პარტნიორი ქვეყნების მხარდაჭერა.
ორდღიანი შეხვედრის წინ გამართულ ბრიფინგზე ნატოს გენერალურმა მდივანმა იენს სტოლტენბერგმა განაცხადა, რომ უკრაინაში შეჭრიდან თითქმის ერთი წლის შემდეგაც პრეზიდენტი პუტინი მშვიდობისთვის არ ემზადება და ახალ შეტევებს იწყებს, ამიტომ უნდა გაგრძელდეს უკრაინის გამარჯვებისა და სამართლიანი და მდგრადი მშვიდობის მისაღწევად საჭირო დახმარება.