აშშ განიხილავს კონფისცირებული ირანული იარაღის უკრაინისთვის გადაცემას

აშშ-ის გაზეთი Wall Street Journal-ი წყაროებზე დაყრდნობით იტყობინება, რომ აშშ-ის ხელისუფლება განიხილავს უკრაინისთვის ირანული კონტრაბანდული იარაღისა და საბრძოლო მასალის გადაცემას, რაც აშშ-ის ფლოტმა ჩაიგდო ხელთ იემენის ნაპირებთან.

ირანი არღვევს გაეროს რეზოლუციას და იარაღით ამარაგებს მეამბოხე ჰუთიტებს იემენში.

უკანასკნელი თვეების განმავლობაში ამერიკის სამხედრო გემებმა იემენის მახლობლად მდებარე აკვატორიაში ხელში ჩაიგდეს 5 ათასი ავტომატი, 1,6 მილიონი ვაზნა, „მცირე რაოდენობის“ ტანკსაწინააღმდეგო რაკეტები და დაახლოებით 7000 დისტანციური ასაფეთქებელი მოწყობილობა, წერს გაზეთი.

ერთი დღით ადრე კი Washington Post-ში დაიბეჭდა მოწოდება, უკრაინას გადაეცეს ირანული იარაღი, რომლის კონფისკაციასაც ახდენენ აშშ-ისა და საფრანგეთის სამხედრო გემები იემენის ნაპირებთან.

„ეს უჩვეულო გადაწყვეტილება გახსნის შეიარაღების ახალ წყაროს, რომელიც აშშ-მა და მისმა მოკავშირეებმა შეიძლება გამოიყენონ, რათა უზრუნველყონ უკრაინის სამხედრო მხარდაჭერის მოთხოვნილებები,“ წერენ სტატიის ავტორები, აშშ-ის ახალი უსაფრთხოების ცენტრის ექსპერტები - ცენტრალური სადაზვერვო სამმართველოს ყოფილი ანალიტიკოსი ანდრეა კენდალ-ტეილორი და ახლო აღმოსავლეთის უსაფრთხოების პროგრამის დირექტორი ჯონათან ლორდი.