ალექსეი გონჩარენკო: ჩვენ ნამდვილად ვასხვავებთ ქართველ ხალხსა და ქართულ ხელისუფლებას

„საქართველომ განიცადა რუსეთის იმპერიის ზარალი, 20% თქვენი ტერიტორიის ოკუპირებულია და არ მესმის, როგორ შეიძლება საქართველოს მთავრობამ დაიკავოს პოზიცია, რომ ომში გვითრევენ“, – ამის შესახებ  უკრაინის რადას დეპუტატმა, ალექსეი გონჩარენკომ „ფორმულას“ ეთერში განაცხადა.

მისი თქმით, მას არ აკმაყოფილებს საქართველოს მთავრობის პოზიცია, თუმცა კმაყოფილია საქართველოს მოსახლეობის პოზიციით.

„პირველ რიგში, ჩვენ ნამდვილად ვასხვავებთ ქართველ ხალხსა და ქართულ ხელისუფლებას. არ ვერევი ქართულ პოლიტიკაში, მაგრამ როგორც უკრაინელი, როგორც პარლამენტის წევრი, როგორც ევროპის საბჭოს წევრი შემიძლია გითხრათ, არ მაკმაყოფილებს საქართველოს მთავრობის პოზიცია და ძალიან კმაყოფილი ვარ საქართველოს მოსახლეობის პოზიციით.

ვიცი, რამდენი მოხალისე ჩამოვიდა, რომელიც იბრძვის ჩვენს მხარდამხარ, ვიცნობ ბევრ ქართველს, რომელიც აგზავნის ჰუმანიტარულ დახმარებას. ესეც უნდა იყოს, რადგან საქართველომ განიცადა რუსეთის იმპერიის ზარალი, ჩვენი ტერიტორიების 20% ოკუპირებულია, 20% თქვენი ტერიტორიის ოკუპირებულია და არ მესმის, როგორ შეიძლება საქართველოს მთავრობამ დაიკავოს პოზიცია, რომ ომში გვითრევენ. ასე არ არის. 50 ქვეყანა ეხმარება უკრაინას სამხედრო თვალსაზრისით, ახალი ზელანდიის ჩათვლით, ყველა ევროპის ქვეყანა და ისინი ომში არ არიან რუსეთთან“, – აცხადებს გონჩარენკო.