Det kjem ny «Matrix»-film

Det blir ein femte «Matrix»-film, skriv Deadline. Filmen blir den første som ikkje er skriven eller regissert av nokon av Wachowski-søstrene.

Manusforfattaren og regissøren av den nye filmen blir Drew Goddard, som tidlegare har regissert «The Cabin in the Woods» og skrive manus til «Cloverfield» og «The Martian», ifølge Deadline.

Filmen er framleis i planleggingsstadiet, og det er uvisst om nokon av stjernene i «Matrix»-serien, som Keanu Reeves, Laurence Fishburne og Carrie Anne-Moss, vil dukke opp. Det er heller ikkje kjent når filmen får premiere.

«Matrix»-filmane handlar om datahackaren Neo, spelt av Keanu Reeves, som blir lokka inn i ei cyber-underverd der ein større krig går føre seg med den verkelege verda, som blir styrt av maskiner og der menneske blir brukte som energikjelde.

«Matrix»-serien blir rekna som blant dei beste sciencefictionfilmane nokosinne, har tent inn over 20 milliardar kroner og vunne fire Oscar-prisar.

(©NTB)