Senatorët republikanë dhe demokratë bëjnë thirrje për sanksione ndaj Turqisë

Ligjvënësit republikanë dhe demokratë të SHBA-së, po i bëjnë presion presidentit amerikan, Donald Trump, të vendosë sanksione ndaj Turqisë, për shkak të blerjes së një sistemi rus të mbrojtjes raketore.

Ata thonë se presidenti duhet të zbatojë një ligj, që parasheh sanksione për shtetet të cilat bëjnë biznes me ushtrinë e Rusisë.

Senatorët republikanë, Rick Scott dhe Todd Young, paraqitën një rezolutë që bën thirrje për sanksione, pasi Ankaraja, javën e kaluar, filloi pranimin e një sistemi të avancuar të mbrojtjes raketore të Rusisë.

Shtëpia e Bardhë ka njoftuar se e ka larguar Turqinë nga programi i furnizimit me aeroplan ushtarak amerikan F-35.

Por, nje senator tjetër nga kampi demokrat, Bob Menendez, tha se kjo masë ndaj Turqisë nuk është e mjaftueshme.

"Ligji në mënyrë të qartë parashikon sanksione për "transaksione të rëndësishme" me sektorët e mbrojtjes dhe inteligjencës së Federatës Ruse", tha ai në një deklaratë me email, raporton Reuters.

Më herët presidenti Trump bëri të ditur se tash për tash SHBA-ja nuk është duke shikuar në drejtim të sanksioneve ndaj Turqisë, megjithatë nuk e përjashtoi mundësinë për një gjë të tillë.

Tash për tash nuk do të ketë sanksione amerikane ndaj Turqisë

SHBA-ja e ka kundërshtuar blerjen e sistemit rus nga ana e Turqisë pasi, siç ka thënë, ai rrezikon aeroplanët amerikanë.

Sistemi rus në Turqi, Trump fajëson Obamën

Agjencia Reuters raporton se rezoluta e senatorëve bën thirrje që administrata Trump të thërrasë bisedimet në NATO për të diskutuar kërcënimet e paraqitura nga Rusia, dhe për të shqyrtuar përfshirjen e Turqisë në NATO.

Turqia duhet të vendosë ndërmjet SHBA-së dhe Rusisë