Gani Talybana ‘geliň, Owganystany bilelikde guralyň’ diýdi
Gani bu barada “Kabul prosesi” diýlip atlandyrylýan duşuşyga gatnaşýan ýurtlaryň we guramalaryň konferensiýasynda mälim etdi. Bu konferensiýada ýurtda 16 ýyldan gowrak wagt bäri dowam edýän urşuň soňuna ýetmek maksady bilen gepleşikler üçin platforma döretmek niýetlenýär.
“Talyban liderleri we onuň ähli agzalary, bu karar siziň eliňizde. Parahatçylygy kabul ediň, gepleşikler üçin bir stoluň daşyna üýşüň we bize bu ýurdy bilelikde gurmaga rugsat beriň” diýip, Gani aýtdy.
Şeýle-de, ol söweşijilere ok atyşygy bes etmegi, tussaglary boşatmagy, pasportlary, Kabulda ýa-da ylalaşylan başga bir ýerde ofisleri açmagy we sanksiýalaryň ýatyrylmagyny teklip etdi.
Owgan prezidenti Talyban bilen gelinjek ylalaşygyň bir bölegi hökmünde konstitusiýany gözden geçirmegi kabul etmäge taýýardygyny hem sözüniň üstüne goşdy.