უკრაინის მმართველმა პარტიამ დამოუკიდებლად შექმნა მმართველი კოალიცია

დღეს კიევში ტარდება ახალი მეცხრე მოწვევის უმაღლესი რადის პირველი სხდომა. ფიცი დადო 425-მა დეპუტატმა (მთლიანობაში რადაში 450 ადგილია, მაგრამ ანექსირებულ ყირიმსა და დონბასის იმ ტერიტორიებზე, რომლებსაც უკრაინა ვერ აკონტროლებს, არჩევნები არ ჩატარებულა).

უკრაინის პარლამენტში უმრავლესობა ეკუთვნის პრეზიდენტ ვოლოდიმირ ზელენსკის პარტია „ხალხის მსახურს“. მათ 254 მანდატი მიიღეს. უმაღლესი რადის სხდომაზე გამოცხადდა, რომ ფრაქცია „ხალხის მსახურმა“ ერთპიროვნულად ჩამოაყალიბა მმართველი კოალიცია. ეს ნიშნავს, რომ მას სხვა პარტიებთან კონსულტაციების გარეშე შეუძლია შესთავაზოს პრეზიდენტს ახალი პრემიერ-მინისტრის კანდიდატურა. უკრაინის მედიის ცნობით, ეს იქნება 35 წლის ალექსეი ჰონჩარუკი. ოფიციალურად ამის თაობაზე ჯერ არ გამოუცხადებიათ.

წინა პრემიერ-მინისტრმა ვოლოდიმირ ჰროისმანმა დეპუტატების წინაშე გამოსვლისას გამოაცხადა თავისი მთავრობის გადადგომის შესახებ.

რადის სხდომას უძღვება დროებითი პრეზიდიუმი პარტია „ხალხის მსახურის“ თავმჯდომარის, დმიტრი რაზუმკოვის ხელმძღვანელობით. როგორც მოელიან, ის რადის სპიკერად იქნება არჩეული.

პარლამენტში შეიქმნა 6 ფრაქცია და დეპუტატთა ჯგუფი - „ხალხის მსახურის გარდა ესენი არიან: „ოპოზიციური პლატფორმა - სიცოცხლისთვის“, პეტრო პოროშენკოს „ევროპული სოლიდარობა“, იულია ტიმოშენკოს „ბატკივშჩინა“, სვიატოსლავ ვაკარჩუკის „ჰოლოსი“ და დამოუკიდებელი დეპუტატების მიერ შექმნილი ჯგუფი „მომავლისთვის“.