13-майда Кыргызстанда жана дүйнөдө эмне болду? “Азаттык” күндүн башкы жаңылыктарын тизмектейт.
Куткаруучулар Ооганстандын түндүгүндөгү сел каптаган тоолуу аймактарда аман калгандарды издөөнүү улантууда. Нөшөрлөгөн жаандан кийинки селден бери дегенде 300 киши каза тапты.
13-майда Тбилисидеги митингде 20 чакты киши кармалды. Полиция жекшембиге караган түнү парламенттин жанында акцияны уланткан кишилерди күч менен таркатууга аракеттенди. Ошол эле күнү парламенттин укук комитети "чет элдик агент" мыйзамын үчүнчү окууда жактырды.
30 жыл мурун Бишкектеги көркөм сүрөт окуу жайына академия макамы берилген. Окуу жай белгилүү айкелчи Тургунбай Садыковдун ысымын алып жүрөт. Азыркы технология өнүккөн, жасалма интеллекттин жардамы менен алеки заматта каалаган сүрөттү тартып алууга мүмкүн болгон заманда сүрөт академиясында жагдай кандай? Сүрөт өнөрү кантип жашап жатат? Сүрөтчүлөрдүн негизги темасы эмне? “Данисте” ушул суроолорго жооп издеди.
13-майда Астана соту аялын өлтүрүүгө айыпталган Казакстандын экс-экономика министри Куандык Бишимбаевге өкүм чыгарып, 24 жылга кести. "Кылмышты жашырган" деп күнөөлөнгөн анын тууганы Бакытжан Байжанов төрт жылга кесилди.
Азап-тозокту башынан кечирип, немис туткунунан, андан кийин Сибирдеги советтик лагерден Ала-Тоого аман-эсен жеткен кыргыздын уулу Сатар Алманбетовдун тагдыры тууралуу тарых илимдеринин доктору Тынчтыкбек Чоротегин жана белгилүү жазууучу, тарыхчы Арслан Капай уулу Койчиев менен маек курабыз.