Бишкекте жер титиреди
Сейсмология институтунун маалыматында, 20-октябрь күнү саат 13:35те Кыргызстан менен Казакстандын чек арасында, очогундагы күчү 4 баллга жеткен жер титирөө катталды. Силкинүүнүн күчү Кант жана Бишкек шаарларында 4 балл сезилди.
Жер титирөөдөн жабыркагандар жана кыйроолор катталган жок.
Казакстандын Өзгөчө кырдаалдар министрлиги Алматы шаарынан 176 чакырым аралыкта кыргыз-казак чек арасында очогундагы күчү 4,9 баллга жеткенин маалымдады.
Кыргызстандын Өзгөчө кырдаалдар министрлиги 19-октябрда 21:16да Нарын облусунун аймагында очогундагы күчү 3 баллды түзгөн жер титирөө болгонун маалымдаган. Ага ылайык, силкинүү Кочкор районунун Кочкор, Большевик, Кара-Суу, Кара-Тоо айылдарында - 3 балл, Терек, Ак-Жар, Арсы, Семиз-Бел, Кара-Саз, Кара-Күнгөй айылдарында 2,5 баллга чейин сезилген.
Кыргызстанда 12 район сейсмикалык кооптуу зонада жайгашкан. Чүй облусунда сейсмикалык кооптуулугу жогору болгон зонага - Бишкек шаары, Аламүдүн жана Сокулук райондору кирет. Жалал-Абад облусунда - Базар-Коргон, Ноокен жана Сузак райондору, Ош облусунда — Ош шаары, Араван, Кара-Суу жана Өзгөн райондору, ал эми Баткен облусунда - Кадамжай району, Нарын облусунда - Кочкор району кооптуу зоналар болуп саналат.
Өлкөдө жылына орто эсеп менен 3 миң жер титирөө катталат, анын он-жыйырмага жакыны беш баллдан ашкан магнитудадагы жер титирөөлөр. Жер титирөөнүн очогу жер кыртышынын чегинде жайгашкан. Көпчүлүк гипо-борборлор беш чакырымдан 25 чакырымга чейинки тереңдикте орун алган.(ZKo)