د امریکا پوځ کینیا ته اضافي سرتېري استولي

د امریکا پوځ تأیید کړې چې د یکشنبې په ورځ د الشباب تندلارې ډلې په برید کې د درېیو امریکایانو له وژل کېدو وروسته‌یې کینیا ته اضافي پوځي ځواکونه استولي دي.


د جنوري په پنځمه په "ماندا بې" کې د امریکايي ځواکونو پر هوايي اډې له القاعده شبکې سره د تړلې سومالیایۍ الشباب ډلې په برید کې یو امریکایي سرتېری او دوه قراردادیان ووژل شول.


په عین حال کې یوه امریکايي چارواکي د خپل هویت د نه‌ښودلو په شرط روېټرز خبري اژانس ته ویلي چې شااوخوا ۵۰ سرتېري کینیا ته استول شوي.


الشباب وايي "ماندا بې" اډه په سیمه کې د اسلام پر ضد د امریکايي صلیبیانو د خېز دره ده.


په افریقا کې د امریکايي ځواکونو د قرارګاه د عملیاتو مشر جنرال ویلیم ګېلر د جرمني خبري اژانس ته ویلي دي چې د دوی اډې ته اضافي ځواکونه د امنیتي تدابیرو د پیاوړي کولو په مقصد استول شوي.