چارواکي: فاریاب کې د طالبانو پر ضد لاریونونه شوي
د شیرین تګاب ولسوال ذین الله ذکي آزادۍ راډیو ته وویل چې د کوه صیاد او اسلام کلا سیمو د اوسېدونکو لاریونونه نن غرمه مهال پیل شوي او اوس هم روان دي.
ښاغلي ذکي د طالبانو بې عدالتي او ظلم د دې لاریونونو علت وباله.
هغه زیاته کړه: "دوی خلکو ته ستونزې جوړولې، له زور څخه یې کار اخیست، له خلکو یې عشر او غیرقانوني پیسې اخیستې، خلک له دې وضعیت څخه پوزې ته راغلي وو."
طالبانو تراوسه د چارواکو د دې ادعا په اړه څه نه دي ویلي.
شیرین تګاب د مزار- میمنې د لویې لارې په اوږدو کې پرته ولسوالي ده چې پر یو شمير سیمو یې طالبان ولکه لري.