د کندهار چارواکي: پر ۲ لسوالیو د طالبانو بریدونه په شا وتمبول شول
د کندهار د امنیه قوماندانۍ ویاند جمال ناصر بارکزي نن چهارشنبه ازادي راډیو ته په دې اړه وویل: "وسلهوالو طالبانو تېره شپه په تخته پل ولسوالۍ کې پر امنیتي پوسته برید وکړ چې د افغان ځواکونو له مقاومت سره مخامخ شول او په پای کې پنځه تنه طالبان ووژل شول او ۹ نور یې ټپیان شول."
د ښاغلي بارکزي په وینا په همدې شپه طالبانو په ژړۍ ولسوالۍ کې هم پر یوې بلې امنیتي پوستې برید کړی چې په متقابلو نښتو کې د طالبانو اته تنه ووژل شول او درې نور یې ټپیان شول.
د کندهار د امنیه قوماندانۍ ویاند زیاتوي چې په دې نښتو کې درې افغان امنیتي ځواکونه هم وژل شوي دي.
وسلهوالو طالبانو تر اوسه په دې اړه څه نهدي ویلي.