ناټو ملکي استازی: افغانستان کې روان تاوتریخوالی د منلو نه دی
سټفانو پونتی کوروو ازادي راډیو ته په یوه ځانګړې مرکه کې وویل، طالبانو په ښارونو او ایتلافي ځواکونو بریدونه درولي، خو له دې سره سره یې هم تاوتریخوالی روان ساتلی.
هغه زیاته کړه: "دا ممکن د دې لپاره وي چې طالبان په دې باور دي چې په دې توګه به د سولې بهیر کې له پیاوړي دریځه برخه اخلي، اما دا په بشپړه توګه یو غلط نظر دی، زما په نظر دا حساب ناسم دی."
د ناټو ملکي استازي ټینګار وکړ چې افغانستان کې د تاوتریخوالي کچه باید کمه شي.
دغه غوښتنه داسې مهال کیږي چې له پرون راهیسې، پکتیکا، غور، کندز، کاپیسا او یوشمېر نورو سیمو کې خونړۍ جګړې شوې دي.