امنیتي چارواکي: کندهار کې ۶ وسله وال طالبان وژل شوي
د کندهار د امنیې قومندانۍ ویاند جمال ناصر بارکزي ازادي راډیو ته وویل، دا وسله وال هغه مهال ووژل شول چې د ارغستان ولسوالۍ کې یې د پولیسو پر پوستو برید وکړ.
هغه زیاته کړه: "تېره شپه وسله والو د ارغستان ولسوالۍ د جانګیر مانده په سیمه کې د پولیسو پر پوستو برید کړی چې امنیتي ځواکونو غاښ ماتونکی ځواب ورکړی په همدې جګړه کې ۶ طالب وسله وال وژل شوي دي. "
د بارکزي په وینا طالبان له سیمې تښتېدلي.
وسله والو طالبانو د کندهار د چارواکو د دې ادعا په اړه تبصره نه ده کړې.
په داسې حال کې چې د طالبانو او افغان حکومت تر منځ د مخامخ خبرو د پیل هڅې روانې دي او بېلابېلو لورو له طالبانو د تاوتریخوالي د کمولو غوښتنه کړې دې وسله والې ډلې پر افغان امنیتي ځواکونو خپل بریدونه روان ساتلي دي.