کاپیسا کې یوې چاودنې ۵ کسان ووژل
امنیتي سرچینو په سیمه کې د ازادي راډیو خبریال ته ویلي، چاودنه نن یکشنبه (د مرغومي ۱۴مه) ماسپښین د کاپیسا د مرکز په صیاد سیمه کې شوې ده.
د کاپیسا د ولایتي شورا رئیس محمد حسین سنجني ازادي راډیو ته وویل، مقناطیسي ماین د عالمانو شورا د رئیس په موټر کې ځای پر ځای شوی و.
د عالمانو شورا د رئیس روغتیايي وضعیت خراب بلل شوی دی.
د دې چاودنې مسوولیت چا نه دی منلی.
تېره اوونۍ په کاپیسا کې یوه مدني فعاله فرشته کوهستاني د وسله والو په حمله کې له خپل ورور سره وژل شوې وه.