چارواکي: ننګرهار کې د پاکستان د لښکر اسلام ډلې مشر منګل باغ وژل شوی

د ننګرهار والي وایي، د پاکستان د لښکر اسلام ډلې مشر منګل باغ په دغه ولایت کې وژل شوی دی. 


ضیاالحق امرخېل نن پنجشنبه (د سلواغې ۹مه) پر خپله ټویټرپاڼه لیکلي چې منګل باغ او دوه ملګري یې له غرمې مخکې د اچین ولسوالۍ په باندر دره کې د خپل ماین په چاودنه کې ووژل شول. 




امرخېل وایي، منګل باغ د اچین ولسوالۍ په ناامنیو کې لاس درلود. 


منګل باغ د خیبر ایجنسۍ اوسیدونکی و  چې د راپورونو له مخې د پاکستان د پوځ له عملیاتو وروسته افغانستان ته تښتیدلی و. 


پاکستاني چارواکو ویلي، د منګل باغ په مشرۍ د لښکر اسلام ډله په خیبر پښتونخوا کې د خونړیدو بریدونو مسوله ده.