Дар Тошканд соҳибкореро бо айби "дуздӣ" ва "қаллобӣ" ба додгоҳ кашиданд
Дар додгоҳе дар шаҳри Тошканди Узбекистон рӯзи 4-уми феврал баррасии парвандаи соҳибкори 34-сола Элдор Миралиев шуруъ шуд. Элдор Миралиев бародари хурдии соҳибкори парандапарвар Ойбек Миралиев, машҳур бо лақаби "Ойбек-Фаберже", аст. Миралиеви хурдиро дар "дуздӣ" ва "қаллобӣ" айбдор мекунанд.
Тафтишот мегӯяд, Элдор Миралиев амволи хонаводаи соҳибкор Ғафур Раҳимов ва афроди дигарро, ки арзиши умумиашон ба чанд миллион доллар мерасад, тавассути қаллобӣ аз худ кардааст. Аммо яке аз пайвандони Элдор Миралиев гуфт, вай "қурбонии ихлофи назар байни соҳибкор Ғафур Раҳимов ва президенти Узбекистон Шавкат Мирзиёев шудааст".
Ба гуфтаи Абдураҳмон Ташанов, хабарнигоре аз шаҳри Тошканд, Ойбек Миралиев ҳам дар доираи парвандаи мазкур дар баробари бародараш ба додгоҳ ҷалб шудааст. Пайвандони Миралиевҳо мегӯянд, бародарон дар гузаштаи начандон дур шарики тиҷории соҳибкор Ғафур Раҳимов буданд.
"Раҳимов баъди он ки натавонист, ваъдаҳои ба президент додаашро иҷро кунанд, шарикони тиҷориашро қурбон кард",-мегӯянд пайвандони Миралиевҳо.
Дар соли 2016 Ғафур Раҳимов ваъдаи сохтмони майдони варзишӣ ва мактаби президентиро дода буд. Аммо дертар бо баҳонаи ин ки бародарон Миралиевҳо бо роҳи фиреб сарвати ӯро аз худ кардаанд, аз сохтмони иншооти ваъдагӣ сарпечӣ кард.
Бино бар ҳуҷҷатҳое, ки дар ихтиёри расонаҳо қарор гирифтаанд, парванда нисбати бародарон Миралиевҳо ҳанӯз дар моҳи феврали соли 2019 боз шуда аст.
Додситонии кулли Узбекистон рӯзи 21-уми декабр Ойбек Миралиевро дар ҷустуҷӯ эълом ва рӯзи 23-юми декабр ба ҳабс гирифт.
Даҳ соли охир Ойбек Миралиевро бо лақабҳои "Ойбек-тухм", "Ойбек-Фаберже" ва "Киндер сюрприз" мешиносанд. Вай дар тиҷорати парандапарварии Узбекистон яке аз соҳибкорони калидӣ аст. Соли 2017 президенти Узбекистон Шавкат Мирзиёев аз корхонаи бародарон Миралиевҳо дидан ва аз фаъолияти онҳо тамҷид карда буд.