Әлмәттән мобилизацияләнгән егет ялга кайтканда әнисенә сюрприз ясаган

Әлмәт районына ике атналык ялга хәрбиләр кайта башлады. Бүген махсус хәрби операция зонасыннан Әлмәтнең ике кешесе кайтты, тагын бер хәрби Сарман районына китте.

Хәрбиләрнең берсе әнисенә сюрприз ясарга булган –  әнисе аның кайтуы турында белмәгән. Улын үз фатиры бусагасында күргәч, ул хисләрен тыя алмыйча елый башлый. Яшь егеткә дә очрашу тәэсир итә, ул «еламаска, еламаска, дип юл буе уйлап баруын», сөйләде.

Әнисенә сюрпризы уңышлы килеп чыккан, ә менә хатыны Екатеринадан ул үзенең кайтуын яшерә алмаган. Аның кайтуы турында ул алдан ук белгән. Әнисе белән очрашканнан соң ук хәрби егет хатынының эшенә киткән.

«Татар-информ» мобилизацияләнгән хәрбиләрнең махсус хәрби операция зонасыннан ялга кайта башлауларын хәбәр иткән иде.

Исегезгә төшерәбез, махсус операциядә катнашучыларга ял тәэмин итүне Федераль җыенга юлламасында Россия Президенты Владимир Путин йөкләде. Ул искәрткәнчә, хәрбиләр ярты елга бер тапкыр һәм 14 көннән дә ким булмаган вакыт ял итәргә тиеш.