Новости за 27.03.2023

Самара Тарихи мәчетендә Рамазан ае дәвамында һәр көнне икенде намазыннан соң изге Коръән китабын тулысынча укып чыгарга җыеналар. Көн саен бер җүз (Коръәннең 1/30 өлеше) укылачак.

Атна уртасында Татарстанда һава торышы аномаль җылы була, әмма антициклон йогынтысында температура төшә, бигрәк тә төнлә. Бу турыда Татарстан Гидрометеорология һәм әйләнә-тирә мохитне күзәтү үзәге матбугат хезмәте хәбәр итә.

Санкт-Петербургта «Эмеральд» гранд-отеленең парад залында татар морзалары җыенына нигез салынуның 15 еллык юбилеен бәйрәм иттеләр. Залда Россия һәм Губерна морзалар җыенының җитәкчеләре, татар морзалары, шулай ук Санкт-Петербургның һәм Ленинград өлкәсенең күпсанлы җәмәгать эшлеклеләре катнашты. Бу хакта Татарстанның Санкт-Петербург шәһәрендәге һәм Ленинград өлкәсендәге Даими вәкиллегенең матбугат хезмәте хәбәр итә.

Дәүләт Советы командасы Татарстан Республикасы дәүләт һәм муниципаль хезмәткәрләре Спартакиадасы кысаларында шахмат ярышларында беренче урынны алды. Ярышлар 25-26 март көннәрендә шахмат, шашка һәм го буенча Нәҗметдинов исемендәге республика олимпия резервы спорт мәктәбе базасында узды.

«Татарстанның мәдәни башкаласы» конкурсында җиңгән район быел 3 млн сумлык сертификат ала. Ул акча мәдәни проектларны алга таба үстерүгә юнәлдереләчәк. Бу хакта бүген Татарстан Премьер-министрының урынбасары Ләйлә Фазлыева «Татар-информ»да матбугат конференциясендә хәбәр итте.

«Татар егете-2023» республика конкурсына йомгак ясалды. Сайлап алу этабында Татарстаннан йөзләп егет катнашты. Бәйгедә Кукмара районы егете Рәмис Габидуллин җиңде. Бу хакта Татарстан Яшьләр эшләре министрлыгының матбугат хезмәте хәбәр итә.

«Зур формадагы иң яхшы спектакль» номинациясендә Камал театры «Тантана» премиясе белән бүләкләнде. «Тантана» комиссиясе Фәрит Бикчәнтәев куйган «Болганчык еллар. Мөһаҗирләр» (Мәхмүт Галәү) спектаклен елның зур формадагы иң яхшы спектакле дип тапкан.

«Кече формадагы иң яхшы спектакль» номинациясендә Коки Митаниның «Академия смеха» пьесасы буенча Айдар Җаббаров куйган «Көл» спектакле өчен Камал театры бүләкләнде.

Татарстанда язгы ташу вакытында 26 йорт яны кишәрлеген, тәбәнәк күперне һәм ике юлны су баскан. Бу хакта Россия Гадәттән тыш хәлләр министрлыгының Татарстан буенча Баш идарәсе матбугат хезмәтендә хәбәр иттеләр.

«Тантана» премиясенең «Балалар өчен иң яхшы спектакль» номинациясендә «Серая шейка» спектакле өчен «Әкият» курчак театры бүләкләнде.

Салават Фәтхетдинов Əлмәт театрының «Ул әле өйләнмәгән иде» спектаклен бу сезонның иң яхшы спектакле дип саный. Бу хакта ул «Тантана» республика театр премиясен тапшыру тантанасында үзенең Шамил Закиров исемендәге премиясен тапшырырга чыккач әйтте.

«Тантана» театр премиясенең «Иң яхшы ир-ат роле» һәм «Иң яхшы хатын-кыз роле» номинацияләрендә ТЮЗ артистлары җиңде.

9 апрельдә Свердловск өлкәсендә «Яшьлек» татар җыры ансамбле яңа программа тәкъдим итә. Ул коллективның 75 еллык юбилеена багышланган. Ансамбль белән Рафис Нигамадьянов җитәкчелек итә.

«Эксперимент» номинациясендә «Тантана» премиясе белән «Дөм» спектакле өчен Әлмәт татар дәүләт драма театры бүләкләнде. Театрга премияне режиссер Айдар Җаббаров тапшырды.

«Намус һәм тугрылык» номинациясендә «Тантана» театр премиясе белән Сабир Өметбаев исемендәге Минзәлә Татар дәүләт драма театры артисты, Татарстанның халык, Башкортстанның атказанган артисты Фоат Зарипов бүләкләнде.

Әлмәт театры директоры Фәридә Исмәгыйлева Зәкия Туешева премиясе лауретларын игълан итте.

Россия Фән һәм югары белем министрлыгы югары уку йортларында бюджет урыннары күләмен билгеләүнең бердәм тәртибен билгеләргә тәкъдим итте. Бу хакта РИА Новости министрлыкка сылтама белән хәбәр итә.

«Тантана» премиясен тапшыру чарасында Дамир Сираҗиев исемендәге премия лауреатларын Татарстан Театр әһелләре берлеге рәисе, Камал театрының баш режиссеры Фәрит Бикчәнтәев игълан итте.

Изге Рамазан ае алдыннан Саратов Җәмигъ мәчете территориясендә махсус чатыр урнаштырылды. Биредә Изге айның беренче көненнән үк күмәк ифтарлар үткәрелә. Бу хакта Россия Мөфтиләр шурасының матбугат хезмәте хәбәр итә.

«Музыкаль спектакльдә иң яхшы роль (опера, музыкаль спектакль, мюзикл)» номинациясендә «Кави-Сәрвәр» операсында Кави һәм Сәрвәр рольләре өчен Эльза һәм Артур Исламовлар бүләкләнде.

«Курчак театрының иң яхшы артисты» номинациясендә «Әкият» курчак театры артисты Айвар Гыймаев бүләкләнде. Актер бу бүләккә Николай Гумилев әсәре буенча куелган «Дитя Аллаха» спектаклендәге рольләре өчен лаек булды.

Казан Россиянең мәдәни һәм китапханәләр башкаласы исеме өчен конкурста катнашырга җыена. Бу хакта бүген Татарстан вице-премьеры Ләйлә Фазлыева «Татар-информ» агентлыгында матбугат конференциясендә хәбәр итте.

«Тантана» театр премиясенең «Сезон дәвамында ирешкән уңышлары өчен» номинациясендә композитор Миләүшә Хәйруллина бүләкләнде.

Тинчурин театры артисты Ирек Хафизовка »Тантана» премиясе тапшырылды. Премия «Икенче пландагы иң яхшы ир-ат роле» номинациясендә Тинчурин театрының «Идегәй» спектаклендә Туктамыш хан роле өчен бирелде.

«Тантана» театр премиясе белән «Икенче пландагы иң яхшы хатын-кыз роле» номинациясендә Камал театры артисты, Россиянең һәм Татарстанның халык артисты Алсу Гайнуллина бүләкләнде.