Фәрит Мөхәммәтшин — омбудсменнарга: Сезгә «Зур рәхмәт» дип килүчеләр сирәк

Оешканнан бирле егерме елдан артык вакыт эчендә Татарстанда Кеше хокуклары буенча вәкаләтле вәкил институты халыкның абруен һәм ышанычын яулады. Бу хакта Татарстан Дәүләт Советы Рәисе Фәрит Мөхәммәтшин белдерде. Ул бу турыда Казанда узган «Омбудсменнарның нәтиҗәле тәҗрибәсе: милли үзенчәлекләр һәм универсаль алымнар» халыкара фәнни-гамәли конференциясендә җиткерде.

«Омбудсмен Татарстанда гражданнардан килгән мәгълүматны анализлый һәм гомумиләштерә, парламент утырышларында әлеге ситуацияне хәл итү тәкъдиме белән чыга», — диде спикер.

Мөхәммәтшин кеше хокуклары буенча вәкаләтле вәкилләрнең халык һәм дәүләт хакимияте органнары арасында «проблема һәм бурычлар буенча туры күпер» булуын һәм омбудсменнарга ышанычның үсү баруын ассызыклады.

Парламент башлыгы сүзләренчә, заманча таләпләр яңа проблема һәм бурычларны ачыклый. «Һәм бик әзерлекле һәм кешелекле кешеләр эшләгән бу институтка мөрәҗәгатьләр арта бара. Сезнең янга: «Зур рәхмәт!» дип килүчеләр сирәк. Сезгә «Ярдәм ит, бир, якла» яки «Коткар» дип киләләр. Ирегеннән мәхрүм итү урыннарында утыручылар да бар. Сез алар белән дә эшләргә мөмкинлек табасыз», — диде ул.

Дәүләт Советы Рәисе күпмилләтле Татарстанда һәр халыкның телен, гореф-гадәтләрен, йолаларын, мәдәниятен саклау юнәлешендә эш алып барыла, дип өстәде. «Монда омбудсменның да роле зур»,— дип ышандырды ул.

Мөхәммәтшин шулай ук Татарстан Рәисе Рөстәм Миңнехановның конференциядә катнашучыларга сәламләвен җиткерде.