«Созвездие-Йолдызлык» фестиваленең жюри әгъзалары традицион мастер-классларын башлады

«Созвездие-Йолдызлык» фестиваленең жюри әгъзалары традицион мастер-классларын башлап җибәргән. Тәтештә һәм Апаста XXIV «Созвездие-Йолдызлык» эстрада сәнгате ачык республика телевизион яшьләр фестивале алдыннан беренче мастер-класслар узган.

«Проектның булачак катнашучылары һәм аларның педагоглары фестивальнең танылган жюри әгъзалары тәҗрибәсен үзләштерә. Аларга “Вокал”, “Хореография” һәм “Конферанс” секцияләре тәкъдим ителде», дип хәбәр итә фестивальнең матбугат үзәге.

Вокал юнәлешен җырчы, актриса, продюсер, Сергей Безруков җитәкчелегендәге Мәскәү Губерна театры труппасы мөдире Алина Ивах үз өстенә алган. Балаларга нәфис сүз осталыгын Татарстанның һәм Кырымның атказанган артисты, «Созвездие-Йолдызлык» арт-резиденциясенең сәнгать җитәкчесе Дмитрий Платонов җиткергән.

Хореография буенча ТР Дәүләт җыр һәм бию ансамбленең баш балетмейстеры, РФ атказанган, ТР халык артисты Раилә Гарипова, шулай ук «Дорога из города» бию театры студиясенең сәнгать җитәкчеләре, «Созвездие-Йолдызлык» арт-резиденциясенең балетмейстерлары Лилия һәм Айрат Баһаветдиновлар дәрес биргән.

Фестиваль хәрәкәтенең генераль продюсеры Дмитрий Туманов фестивальнең белем бирү өлеше проектның төп юнәлешләренең берсе дип саный. "Республиканың районнарында искиткеч вокалистлар, биючеләр һәм нәфис сүз осталары әзерләнә. Без бу юнәлешне сыйфатлы яңа дәрәҗәгә күтәрергә теләр идек. Кызганыч, мәктәпләрдә актерлык осталыгы укытылмый. Без бу бушлыкны тутырырга тырышабыз: педагогларны һәр әсәрнең ниятен җиткерүгә аерым игътибар бирергә чакырабыз”, — дип аңлатты мастер-класслар эчтәлеген Дмитрий Туманов.

«Созвездие-Йолдызлык» фестиваленең белем бирү, конкурс һәм концерт өлешләре проектның төп миссиясенә — җирлекләрдә республиканың иҗади потенциалын саклап калуга бәйле. Шуңа күрә фестиваль эшенең күп өлеше районнарда уза.

“Безнең бурыч – җирлекләрдә балалар үзләрен районнарына һәм республикаларына кирәкле итеп хис итүенә ирешү. Үсеп җиткәч, алар туган авылларын яки шәһәрләрен яңа талант белән бизәр”, — дип ышана Дмитрий Туманов.

• Ел ахырына кадәр жюри әгъзалары шулай ук Татарстан Республикасының башка районнары педагоглары һәм аларның укучылары белән эшләргә планлаштыра.
• «Созвездие-Йолдызлык» фестиваль хәрәкәте Россия Федерациясенең ЮНЕСКО эшләре буенча Комиссиясе химаясендә һәм ТР Рәисе Рөстәм Миңнеханов патронажында уза.