Коронавирус йоктыру куркынычын киметү ысулы билгеле
(Казан, 12 гыйнвар, «Татар-информ»). Россия Кулланучы хокукларын яклау һәм кеше иминлеге өлкәсендә күзәтчелек федераль хезмәтенең (Роспотребнадзор) киңәшләрен тоткан очракта, коронавирус инфекциясен йоктыру куркынычы минималь, барлык кагыйдәләрне дә үтәсәң, хастаханәдә яңа урыннар да кирәкмәячәк. Бу хакта РИА Новости агентлыгы Роспотребнадзор башлыгы Анна Поповага сылтама белән хәбәр итә.
«Милек формасы нинди булуга да карамастан, барлык тармакларга караган предприятиеләр, икътисадның һәр өлкәсе өчен методик киңәшләр бар. Аларны тайпылышсыз үтәгән очракта, коронавирус инфекциясен йоктыру куркынычы бик аз. Барлык кагыйдәләрне дә үтәсәң, хастаханәләрдә яңа урыннар да таләп ителмәячәк», - диде Попова РФ Хөкүмәте каршындагы коронавируска каршы көрәш буенча координация советының президиум утырышында.